Lufta për të kapur tregun e shitjes së medikamenteve dhe pajisjeve farmaceutike në zonën veriore të Shqipërisë, si dhe një gjobëvënie e mundshme ndaj biznesmenit Agim Kuka, janë dy pistat kryesore ku policia e Shkodrës, po heton për vendosjen e tritolit në makinën e shtetases Suida Kuka.
Ngjarja ndodhi kur Drejtoresha e Operatorit të Kujdesit Shëndetësor në Shkodër, kishte vetëm 1 muaj e gjysmë që ishte emëruar në këtë institucion.
Sipas burimeve të policisë Shkodër, pista e detyrës është parësore dhe kjo përforcohet akoma dhe më tepër nga përmbajtja e një SMS-je, që ka mbërritur ditën e ngjarjes, në telefonin e drejtoreshës.
“…largohu dhe mos qëndro asnjë sekondë në atë zyrë, duhet të na qëndrosh larg… të ikësh edhe prej Shkodrës…” mësohet se është përmbajtja e sms që tashmë është në dokumentet e policisë.
Megjithatë autori duket se është treguar i kujdesshëm duke mos u identifikuar. Pas këtij mesazhi Kuka, ka njoftuar policinë e Shkodrës.
Pavarësisht kësaj policia e Shkodrës po kryer veprime hetimore edhe në pistën e gjobëvënien. Babai i Suida Kukës, është një nga biznesmenët më të njohur në Shkodër.
Ai zotëron një kompani të tregtimit të elektroshtëpiake ndaj dhe një dyshim i tillë nuk mund të përjashtohet.
/Ora News – Elton Qyno/
