Në zonën e Kombinatit në kryeqytet, fadromat e Inspektoriatit të Mbrojtjes së Territorit kanë nisur shembjen e 6 banesave në kuadër të zgjerimit të varrezave të Sharrës.
Familjeve në 6 banesat u është dërguar më 15 qershor një shkresë që të lirojnë banesat pasi do të zhvillohet zona.
Pak para se të vinte njoftimi se do u shembet banesa atyre u ka ardhur vendimi se do të skualifikohen nga procesi i legalizimit.
Një banore me lot në sy sheh që i shembet banesa dhe nuk di se ku do të flejë sot me 3 fëmijët e saj. Në kokë ka shumë pikëpyetje, për të cilat tregon nuk ka marrë asnjë përgjigje nga bashkia e Tiranës ndërsa ndihet e hedhur në mes të 4 rrugëve .
“Nuk na kanë thënë asgjë. Thjesht morën vendimin për të prishur. Të hapin derën e na thonë ik ku të duash. Ku të çoj unë 3 fëmijët sot në mbrëmje? Vetëm vendim për të prishur. Ku shkuan 25 vite? Një shtëpi tjetër ku mund ta kem? Për sa kohë mund të jem unë me bonus qiraje, dua një shtëpi. Dua aq sa kisha. Jam taksapaguese e rregullt në çdo gjë. Kisha 15 vite në proces legalizimi. Para dy muajsh na vjen letra që nuk legalizohet dhe para një muaji na thonë që do shembet banesa”, tha ajo për gazetarët.
