Eksperti i kriminalistikës, Ervin Karamuço, ka komentuar raportin e publikuar sot për kultivimin e kanabisit, ku Shqipëria renditej e shtata në botë.
I ftuar në ‘Open’, Karamuço ka ngritur alarmin se Shqipëria po shndërrohet në një vend për përpunimin e drogave të forta, si heroina apo kokaina dhe se është e vërtetë që ka një ulje të kanabisit në vend, pasi sipas tij, tani Shqipëria është bërë vend tranziti dhe përpunimi i drogave të forta.
“Është raport që i referohet një kohe, 2016-2019, që e dimë se ka pasur kanabis. Unë do t’i referohem raportit të fundit të Europol, që thotë se ka ulje të kanabisit, por linjat janë rritur për drogat e forta, pra kokainë dhe heroinë. Kjo duhet të na shqetësojë.
Ne jemi bërë vend tranziti dhe përpunimi të drogave të forta, sepse nuk ka më interes nga grupet kriminale për të rrezikuar aq shumë me kanabis. Lufta më e madhe tani e tutje është për drogat e forta”, tha Karamuço.
