Dy administratore qendrash masazhi janë arrestuar nga policia e Tiranës, pasi sipas bluve, në këto ambiente ushtrohet prostitucion.
Në kuadër të aksionit të koduar “SPAK” janë proceduar edhe tre persona të tjerë, ndërsa dy janë shpallur në kërkim.
“Specialistët e Seksionit për Hetimin e Krimeve në Komisariatin e Policisë Nr.2, pas një pune të mirëfilltë hetimore disamujore, bazuar dhe në informacionet e marra në rrugë operative për veprimtarinë e kundërligjshme të prostitucionit në 2 qendra masazhesh, finalizuan operacionin policor të koduar “SPA”. Si rezultat i këtij operacioni u bë ndalimi i shtetaseve: J. D., 30 vjeçe dhe R. L., 20 vjeçe, të dyja banuese në Tiranë, për veprën penale ‘Mbajtja e lokaleve për prostitucion’”, njofton policia.
Dy të arrestuarat administronin dy qendra masazhesh, në zonën e quajtur “Ish-Blloku” dhe në zonën e quajtur “21 Dhjetori”.
Përveç aktivitetit të regjistruar si qendër masazhesh, në këto ambiente ushtrohej edhe aktiviteti i kundërligjshëm i prostitucionit, sqaron policia.
“Në vijim të veprimeve u proceduan penalisht në gjendje të lirë shtetasit A.Ll., Xh.T., për veprën penale “Prostitucioni” dhe A. L., për veprën penale “Moskallëzimi i krimit”. Gjithashtu, në kuadër të këtij operacioni u shpallën në kërkim shtetasit P.N. dhe E.D. Vijon puna për kapjen e tyre”, thuhet më tej në njoftimin e bluve.
