Deputetja e Partisë Demokratike, Jorida Tabaku deklaroi sot në Kuvend se për ndërtimin e aeroportit të Vlorës u dha një zonë e mbrojtur.
“Këtu është dhe ministrja e Mjedisit për aeroportin e Vlorës. Kam komunikuar dhe kam kërkuar sqarim për aeroportin e Vlorës. Shqetësimi i parë për mua është shkelja e marrëveshjes për Stabilizim-Asociimit, ku me një garë i është dhënë një kompanie, me lidhje pranë kryeministrit, që ndërtoi edhe spitalin e Fierit. Si shpërblim mori një kontratë koncesionare në aeroportin e Vlorës”, tha Tabaku.
“Shqetësimi që ekziston është që një zonë e mbrojtur, e gjitha, u hoq nga mbrojtja dhe u dha për ndërtim. Ashtu siç u kafshua Butrinti, po kafshohet dhe aeroporti i Vlorës, pa pasur asnjë konsultim. Në kontratën koncesionare përsipër të gjithë riskun e mban shteti. Nëse nuk ekziston trafiku, qeveria do të kompensojë kompaninë. Qeveria nuk pyet, e ka shkeljen e ligjit si gjë të lehtë. Kjo aferë korruptive duhet të ndalojë menjëherë!”, shtoi ajo.
Ministrja e Turizmit dhe Mjedisit, Mirela Kumbaro deklaroi sot në Kuvend se “njolla e projektit të Aeroportit të Vlorës ndodhet në një zonë që nuk është me ligj, me vendim të Këshillit Kombëtar të Territorit të 2020 dhe me vendim të Këshillit të Ministrave, nuk është zonë e mbrojtur, është në njollën e vjetër të aerodromit”.
Duke iu përgjigjur akuzave të deputetes së Partisë Demokratike, Jorida Tabaku, e cila akuzoi qeverinë se ka dhënë një zonë të mbrojtur në Vlorë për të ndërtuar aeroportin, Kumbaro tha se “të gjitha procedurat e parashikuara nga ligji për dëgjesat publike dhe lejet mjedisore, që kanë prodhuar më tej lejen e zhvillimit të dhënë nga KKT janë respektuar një më një”.
“Çdo koleg deputet, apo media e interesuar për informacion mund ta marrë pranë Ministrisë së Mjedisit, pa asnjë lloj problemi siç e kemi dhënë e ridhënë tashmë disa herë. Kur flasim mirë është që të shikojmë realisht se çfarë po ndodh me këto zona të mbrojtura”, tha Kumbaro.
