Një sasi prej më shumë se 1 kg kokainë është sekuestruar nga policia e Tiranës që ka arrestuar një 46-vjeçar.
Në pranga u vu V.K., 46 vjeç, banues në Lezhë, për veprën penale “Prodhimi dhe shitja e narkotikëve.
“Në rrugën ‘Asim Vokshi’, shërbimet e Policisë kanë lokalizuar dhe arrestuar në flagrancë shtetasin V.K., 46 vjeç, të cilit, gjatë kontrollit fizik, iu gjet dhe iu sekuestrua, në cilësinë e provës materiale, 1 kg e 15 gramë lëndë e dyshuar narkotike kokainë”, njoftoi policia.
Sipas të njëjtave burime, nga verifikimet e kryera ka rezultuar se ky shtetas, në bashkëpunim me persona të tjerë, ende të paidentifikuar, pasi siguronte sasi lënde narkotike në peshën 2-3 kg, e ndante atë në doza, të cilat i shisnin më pas në zona të ndryshme të kryeqytetit dhe të qytetit të Lezhës.
Po punohet për identifikimin dhe kapjen e personave të tjerë të implikuar në këtë veprimtari kriminale, mbyllet njoftimi i bluve.
