Kryetari i bashkisë së Korfuzit verior në Greqi, George Machimaris ka ngritur alarm, pasi deklaratës se qyteti i tij do të transferonte ujin e “Syrit të kaltër” për të përmbushur nevojat e furnizimit gjatë verës.
Për këtë ka reaguar dhe Ministria e turizmit dhe e Mjedisit, e cila ka hedhur poshtë se ekziston një marrëveshje mes dy vendeve për këtë gjë.
“Ministria e Turizmit dhe Mjedisit, nisur nga disa lajme të përhapura në media të ndryshme mbi një propozim/memorandum teknik të supozuar të furnizimit me ujë me transferim burimi nga Syri i Kaltër drejt Korfuzit, sqaron:
Nuk ka asnjë marrëveshje të tillë dhe as nuk ka pasur diskutime për një projekt të ngjashëm sipas lajmit të përhapur nga mediat. Pretendimet e ngritura janë të pavërteta.
Syri i Kaltër është një pasuri natyrore e Shqipërisë, i cili me vendimet e muajit janar 2022 ka marrë një status më të lartë mbrojtjeje, atë të “Parkut Natyror” me një sipërfaqe të rritur në 293 hektarë, për të mbrojtur më mirë Monumentin e Natyrës me të njëjtin emër, që mban brenda parkut.”- thuhet në reagimin e Ministrisë.
