Zbardhet detaje nga aksioni policor që çoi në zbulimin e një depoje armatimesh në kryeqytet.
Në pranga u vu Eno Papa (Beqiri), 27 vjeç, i cili sipas bluve, e kishte marrë garazhin në zonën e Liqenit të Thatë ku u gjetën armët.
Aty u zbulua një arsenal armësh.
Aksioni
Operacioni policor “Silent 2” i zhvilluar nga Sektori kundër Krimeve të Rënda ndaj Jetës dhe Pronës në Drejtorinë Vendore të Policisë Tiranë, vjen në vijim të operacionit “Silent”, që u zhvillua një javë më parë, njofton zyrtarisht policia. Por pa dhënë të tjera detaje nëse ka tjetër lidhje mes dy aksioneve përvecc se janë abuluar armatime.
“Specialistët e Sektorit kundër Krimeve të Rënda ndaj Jetës dhe Pronës në Drejtorinë Vendore të Policisë Tiranë, në bazë të informacioneve të marra në rrugë operative, se në garazhin e një pallati, në rrugën ‘Peti’, një shtetas mbante armë zjarri të llojeve të ndryshme, kanë organizuar operacionin policor të koduar ‘Silent 2’.Në kuadër të këtij operacioni u bë kapja dhe arrestimi në flagrancë i shtetasit Eno Papa (Beqiri), 27 vjeç”, thuhet në njoftimin e bluve.
Gjatë kontrollit të ushtruar në garazhin e marrë me qira nga i riu, shërbimet e Policisë gjetën dhe sekuestruan, në cilësinë e provës materiale, 2 snajpera (njëri prej tyre prodhim i viteve të fundit), 4 armë zjarri kallashnikov, 2 armë zjarri automatike, 4 armë zjarri pistoleta me silenciator, 85 pako me municion luftarak të kalibrave të ndryshëm, pjesë të ndryshme armësh, shënjestra optike për armët e precizionit (snaiper), një sasi e konsiderueshme krehra armësh, tre kallëpe tritoli, sasi lënde e dyshuar eksplozive, 2 palë portotarga elektrike për fshehjen e targave dhe 5 paruke.
Gjithashtu, gjatë kontrollit të banesës së marrë me qira u gjetën dhe u sekuestruan, në cilësinë e provës materiale një automjet në përdorim nga ky shtetas, 3 aparate celulare, 2 laptopë dhe një pasaportë e dyshuar e falsifikuar.
Po punohet për identifikimin dhe kapjen e personave të tjerë të implikuar në këtë veprimtari kriminale, ndërsa materialet i kaluan Prokurorisë, për veprime të mëtejshme procedurale, mbyllet njoftimi i bluve.
