Harta e re Gjyqësore, Ligji i Fiskalizimit dhe ndryshimet ne Ligjin për Tatimet mbi të ardhurat, do të jenë sot në ‘menunë’ e Tryezës së PD me profesionistët e drejtësisë. Në takim do të jetë kryetari i PD, Sali Berisha.
Zyra e Shtypit e PD bën të ditur se takimi do të zhvillohet në orën 18.00 në Hotel Tirana.
Në këtë tryezë do të jenë të pranishëm specialistët e profesioneve të lira të lidhur në mënyrë direkte apo indirekte me Sistemin Gjyqësor.
Në tryezë pritet të diskutojnë avokatë nga Dhomat e Avokatisë në Tiranë, Durrës, Elbasan dhe Korçë, Lorval Petani, Genc Gjokutaj, Ankelita Çela, Arben Lena, Kryetarja e Dhomës së Ndërmjetësuesve Drita Avdyli dhe Ylli Manjani Avokat, nga Dhoma e Avokatisë në Tiranë.
Organizatorja e tyezës, Kryetarja e Komisionit të Apelimit në PD, Adriana Kalaja thekson se “Objekti i takimit janë diskutime dhe propozime nga profesionistë të fushës mbi sfidat në Sistemin e Drejtësisë si dhe ndikimi i hartës së re gjyqësore, ligji i fiskalizimit dhe ndryshimet e ligjit per Tatimin mbi Te Ardhurat në profesionet e lira’.
“Po kështu janë të mirëpritur gjithë idetë dhe propozimet për zgjidhjen e këtij ngërçi me pasoja direkte në gjithë sektorët jetikë të vendit”, shprehet ajo.
