Një shqiptar, emigrant i paligjshëm në Britaninë e Madhe, rrezikon të deportohet në Ruanda. Ai arriti t´i shpëtojë javën e kaluar dërgimit në Afrikë, bazuar në një plan të Qeverisë britanike, që është kundërshtuar nga shumë instanca ndërkombëtare.
Daily Mail në një artikull të tij, ka publikuar apelin që nëna e shqiptarit që rrezikon deportimin në shtetin afrikan, i ka drejtuar kryeministrit britanik Boris Johnson.
Nëna rreth 50 vjeç, e cila jeton në një fshat në veri të Shqipërisë, i kërkuar kryeministrit britanik që të mos ia dërgojë djalin atje pasi rrezikon të vrasë veten.`
“Zoti e ndihmoftë djalin tim. Ai më tha se do të vrasë veten nëse britanikët e dërgojnë të jetojë në Afrikë. Unë po i lutem kryeministrit tuaj Boris Johnson që të mos e dërgojë atë në Ruandë. Nuk do ta shoh më kurrë”, tha ajo për Daily Mail.
Ajo tregoi se e puthi djalin e saj për ti dhënë lamtumirën pak para Krishtlindjeve, ndërsa ai u nis për në Britani me shpresën për të punuar. “Ai donte të shkonte në Angli, por donte të qëndronte këtu me mua. Mendja e tij ishte e dyzuar”, tha ajo.
“Tani jam vetëm me 2 lopë, të cilat janë të ardhurat e mia të vetme. Disa javë më parë, ai telefonoi, për të më thënë se britanikët po e dërgonin në Ruanda”. Duke treguar një fotografi të djalit të saj, ajo shtoi: “Ai më tha nëse do ta çonin të jetonte në Afrikë, ai do të varej. Fjalët e tij për mua ishin: “Unë nuk do të shkoj atje”.
Si qindra të rinj shqiptarë që nisen për në Britani, 20 vjeçari u tha autoriteteve të Mbretërisë së Bashkuar se trafikantët organizuan të gjithë udhëtimin e tij, fillimisht nga fshati i tij në veri të Shqipërisë për në Francën veriore dhe më pas kaloi shtatë muaj në një kamp emigrantësh për të vijuar në një varkë përtej Kanalit për në Britani.
E pyetur sesi djali i saj i varfër mundi ta përballonte udhëtimin, nëna tha: ‘Ndoshta trafikantët e dërguan atë në Angli për të punuar për ta, për të fituar para prej tij dhe për të paguar.’
Sipas burimeve, djali i saj kishte mbërritur me një furgon në pistën e aeroportit Boscombe Down të Ministrisë së Mbrojtjes të martën në mbrëmje kur mbërriti lajmi për një vendim të Gjykatës Evropiane të të Drejtave të Njeriut (GJEDNJ) në Strasburg dhe fluturimi u anulua. Këtë fundjavë, ai mbetet në një qendër paraburgimi ndërsa zyrtarët e Home Office vazhdojnë të planifikojnë fluturime të mëtejshme dhe gjithashtu presin rezultatin e një shqyrtimi gjyqësor në Gjykatën e Lartë muajin e ardhshëm.
Sekretarja e Brendshme Priti Patel e përshkroi vendimin e GJEDNJ-së si ‘skandaloz’ dhe ‘të errët’, duke shtuar: ‘[Ne] nuk e dimë kush janë gjyqtarët, nuk e dimë kush janë paneli, nuk kemi pasur një gjykim – vetëm një deklaratë për shtyp dhe një letër.’
Një grup prej dhjetë shqiptarësh që dolën në breg pas të martës dhe tani ndodhen në qendrën e largimit të emigracionit në Colnbrook pranë Heathrow janë ndër ata që kanë marrë letra që i informonin se mund të dërgoheshin në Ruandë. Të gjithë, përveç një pjese të vogël prej 130 emigrantëve, të cilët u njoftuan se mund të dërgoheshin në Ruandë në fluturimin e ndërprerë të së martës, mbeten në paraburgim.
Rreth një e treta janë sudanezë, dhe të tjerë nga Afganistani, Irani, Egjipti, Iraku, Turqia, Pakistani, Algjeria, Eritrea dhe Vietnami.
Fluturimet e reja konsiderohen të pamundura përpara përfundimit të shqyrtimit gjyqësor. Një burim i Home Office tha: “Ne jemi ende duke e vlerësuar vendimin e GJEDNJ. Është shumë e pazakontë dhe ne nuk e prisnim këtë.
“Është e mundur që ne ende mund të përpiqemi të nisim fluturime të reja përpara shqyrtimit gjyqësor, por ne duhet të jemi të sigurt se ata nuk do të bllokojnë vetëm largimin e njerëzve.
“Por ne jemi të vendosur të vazhdojmë me politikën – asgjë nuk ka ndryshuar për ne”.
Kuptohet se zyrtarët u inkurajuan nga vendimi i gjykatave të Mbretërisë së Bashkuar, i cili u ka dhënë atyre besim për rezultatin e shqyrtimit gjyqësor.
