Dy të rinj janë gjetur të pajetë në makinën që u gjet në fund të rezervuarit të Çekrezës këtë mëngjes, në periferi të kryeqytetit. Ata janë Erjon Muça dhe Dorina Gjokgjinaj.
Makina në rezervuar – Makina në rezervuar u pikas nga roja, i cili më pas lajmëroi policinë. Në një njoftim zyrtar, blutë bënë me dije se rreth orës 07:20, kanë marrë njoftim nga roja i sigurisë së rezervuarit se në vendin e quajtur “Rezervuari i Çekrezës”, ai kishte konstatuar një automjet të fundosur brenda këtij rezervuari. Me marrjen e njoftimit, shërbimet e Policisë shkuan vendngjarje bashkë me shërbimet zjarrfikëse, si dhe polumbarët e Reneas.
Momenti kur makina transportohet me karrotrec, pasi nxirret nga rezervuari
Dy trupa të pajetë – Në një njoftim të dytë, policia konfirmoi se në automjet ishin gjetur dy trupa të pajetë, që janë nxjerrë prej andej nga polumbarët. “Në vijim të informacionit paraprak, i cili bënte fjalë për një mjet të fundosur në vendin e quajtur “Rezervuari i Çekrezës”, ju informojmë se: Si rezultat i kërkimeve nga polumbarët e Reneas u bë e mundur nxjerrja nga mjeti i trupave të pajetë të shtetasve Erion Muçaj, 22 vjeç, dhe Dorina Gjokgjinaj, 20 vjeçe. Grupi hetimor po punon për sqarimin e plotë të rrethanave të ngjarjes”, njoftoi policia.
Dyshimet – Dyshimet e para janë se makina ka përfunduar në rezervuar pasi është aksidentuar, megjithatë hetimet vijojnë. Rruga mbi rezervuar është me çakull dhe ka një kthesë të fortë. “Grupi hetimor po punon për zbardhjen e plotë të rrethanave të ngjarjes”, thuhet më tej në njoftimin e bluve.
