Reperi Cllevio Serbiano, emri i vërtetë i të cilit është Kleviol Ahmeti, vazhdon të qendrojë në qeli pas thyerjes së masës së sigurisë “arrest shtëpie”, ku shkoi në Durrës dhe u konfliktua me reperin tjetër Noizy, pamjet e sherrit të cilat bënë xhiron e rrjetit.
Ai ka qenë i arrestuar për veprat penale ‘Prodhimi dhe shitja e narkotikëve’ dhe ‘Mbajtja pa leje e armëve të ftohta’.
Avokati i reperit, Ndue Pjetra shprehet se veprat penale për të cilat akuzohet Cllevio janë – sipas tij – “një gram hashash” (‘Prodhimi dhe shitja e narkotikëve’) dhe “dy thika që i ka blerë në dyqan” (‘Mbajtja pa leje e armëve të ftohta’).
Sipas avokatit, Cllevio ka shkuar tek lokali i Noizyt për t’i kërkuar falje këtij të fundit për një sharje që i ka bërë në rrjetet sociale, por kundërshtarët e kanë goditur menjëherë.
“Nga arresti i shtëpisë ky vuan… ka kaluar në gjendje depresive. I ka rënë të fikët dhe i ka kërkuar ndihmë prokurorisë, i ka thënë se është në gjendje të keqe dhe i ka thënë se duhet të shkojë të vizitohet dhe t’i marrë ilaçet që duhen marrë.
Prokuroria normalisht, pothuajse e ka pranuar, gjysmë pranimi një fakt dhe ka shkuar. Duke u kthyer, ka ndodhur ajo që ka ndodhur.
Duke u kthyer, sipas atyre bisedave, sepse ne nuk kemi një fakt të mirëfilltë, ai ka kaluar aty dhe për t’i kërkuar falje lidhur me një sharje që i ka bërë…
Në atë moment, ata nuk kanë pretenduar fare, mezi kanë pritur dhe e kanë goditur”, ka thënë Pjetra në RTSH, duke shtuar se çështja me Noizyn tashmë është e mbyllur.
Më tej, avokati shprehet se Cllevio është i rënduar nga keqtrajtimi në burg dhe se para incidentit, i kishin mbetur vetëm edhe disa ditë për t’u liruar. Dhe se arrestimi për largim nga vendi i qëndrimit ka pasur të bëjë me largimin e tij drejt spitalit dhe prokurorisë.
“Unë po ju them po jua deklaroj se vepra penale për të cilën ai sot është në burg, është zero. S’ka asnjë lidhje me qëndrimin e tij në burg. Se kush investon, atëherë na duhet më mirë që të merren informacionet e tjera”, ka deklaruar Pjetra.
Avokati ka përsëritur edhe një herë se çështja me Noizyn është e mbyllur dhe se nuk ka denoncim ndërmjet palëve, ndërsa për pamjet, sipas avokatit, mund të thonë “se ishte një skenë filmike”.
Ndër tjera, avokati tregoi se Cllevio është i rënduar nga keqtrajtimi në burg.
