Një punishte që shërbente për modifikimin e armëve të zjarrit është zbuluar nga policia e Tiranës, që ka arrestuar dy persona.
Në ambientin në fjalë në Kodër Mëzez është sekuestruar arsenal armësh, municion luftarak, pjesë silenciatori dhe pjesë të ndryshme armësh.
Në pranga u vunë Ervis Bakalli, 30 vjeç, dhe Dorian Kalo, 45 vjeç. Të dy, banues në kryeqytet, ata akuzohen për veprën penale “Mbajtja pa leje dhe prodhimi i armëve, armëve shpërthyese dhe municioneve”, kryer në bashkëpunim.
Arrestimet
Në një njoftim për mediat, kreu i Policisë së Tiranës, Lorenc Panganika dhe detaje lidhur me aksionin e koduar “Silent”, të cilin ai e cilësoi “shumë të rëndësishëm”.
Ai tha se aksioni nga Sektori kundër Krimeve të Rënda ndaj Jetës dhe Pronës në Drejtorinë Vendore të Policisë Tiranë erdhi mbi bazën e informacioneve policore se në një banesë në rrugën ‘Shaqir Shima’, në Kodër Mëzez, ushtrohej aktivitet kriminal për prodhimin, shitjen dhe tregtimin e armëve të zjarrit.
“Pas verifikimeve të informacioneve policore, në datën 15.06.2022 u organizua puna dhe u ushtrua kontroll në banesën e shtetasit Ervis Bakalli, në rrugën ‘Shaqir Shima’, në Kodër Mëzez. Në një ambient brenda rrethimit të banesës së këtij shtetasi, të përshtatur si punishte, u konstatuan makineri si: torno, freza dhe vegla të tjera pune që shërbenin për prodhimin dhe modifikimin e pjesëve/mekanizmave të armëve të zjarrit, si dhe për prodhimin e silenciatorëve të armëve. Në momentin e ndërhyrjes nga shërbimet e Policisë, në këtë ambient janë gjetur duke punuar shtetasit Ervis Bakalli dhe Dorian Kalo, të cilët u arrestuan në flagrancë”, sqaroi kreu i policisë së Tiranës.
Sekuestrimet
Gjatë kontrollit të ambienteve të punishtes dhe ambientit përpara rrethimit të banesës së Ervis Bakallit, ku ishte i parkuar dhe automjeti në përdorim nga ky shtetas, janë gjetur dhe sekuestruar në cilësinë e provës materiale: 8 armë zjarri të llojit pistoletë, 3 armë zjarri automatike, 4 zhurmues si ato të armëve të zjarrit pistoletë, silenciatorë, pjesë të ndyshme armësh, një thikë, makineria që shërbente për prodhimin dhe modifikimin e pjesëve të armëve të zjarrit, municion luftarak dhe sende të tjera prej metali që përdoren për modifikimin dhe prodhimin e silenciatorëve të armëve të zjarrit, valixhe me pjesë armësh për modifikim, një sasi parash dhe sende të tjera të kundërligjshme.
Hetimet
Të gjitha armët dhe sendet e tjera të sekuestruara do të dërgohen në Institutin e Policisë Shkencore, për ekzaminime të mëtejshme, për të vërtetuar nëse këto armë janë përdorur në ngjarje kriminale të ndodhura më parë.
Sipas bluve, aksesorët për modifikimin e armëve dhe silenciatorëve vijnë në rrugë ilegale, nga jashtë vendit.
Nga hetimet e deritanishme dyshohet se këto armë bliheshin nga persona me precedent të theksuar kriminal, anëtarë të grupeve kriminale, me qëllim kryerjen e veprave të rënda penale kundër personit.
Kreu i policisë së Tiranës njoftoi se, hetimet për rastin vijojnë në bashkëpunim me agjencitë ligjzbatuese brenda dhe jashtë vendit.
