Policia ka konfirmuar arrestimin e Kasandër Nogës, i cili akuzohet për atentatin në Bruksel disa ditë më parë ndaj Erion Hasabelliut, i cili mbeti i plagosur.
“…Në rastin e Kasandër Nogës, Policia belge dyshon se njëri prej autorëve është Kasandër Noga, pasi në ngjarje dyshohet se janë të përfshirë 2 persona dhe njëri prej tyre akoma nuk është identifikuar”, thuhet në një njoftim të policisë.
Blutë sqarojnë më tej se pas ngjarjes në Bruksel, ka ardhur kërkesë për bashkëpunim dhe Policia shqiptare ka ushtruar disa kontrolle për gjetjen e këtij personi. por ka rezultuar se ky shtetas nuk kishte hyrë në Shqipëri.
Dje, thuhet më tej në njoftim, pas shkëmbimit të informacionit mes Policisë shqiptare dhe Policisë belge për vendndodhjen në Austri të njërit prej autorëve të dyshuar, konkretisht të shtetasit Kasandër Noga 45 vjec nga Patosi i Fierit, ai është arrestuar në Austri nga Policia belge, e cila po punon me Prokurorinë belge, për të zbardhur e dokumentuar me prova ligjore këtë ngjarje.
Operacioni vijon për kapjen e personit tjetër të përfshirë në këtë ngjarje, mbyllet njoftimi i bluve.
