Mediat austriake raportojnë se Kasandro alias Kasandër Noga, në kërkim për plagosjen e Erion Hasanbelliut në Bruksel, është arrestuar në Vjenë.
Pas informacioneve se Noga ndodhej në Vjenë, raportohet se hetuesit arritën ta prangosin rreth ors 9:15. Po sipas të njëjtave burime, operacioni ndodhi në lagjen Donaustadt të Vjenës. 45-vjeçari nuk bëri rezistencë ndaj forcave policore. Raportohet se Kasandër Noga kishte planifikuar të udhëtonte drejt Shqipërisë, së shpejti.
Më herët, mediat belge kishin raportuar se Noga ishte shpallur në kërkim për atentatin në Bruksel.
“43-vjeçari shqiptar Erion Hasanbelliu ka pësuar lëndime të rrezikshme për jetën nga të shtënat me armë zjarri në Bruksel. Ai ka marrë gjashtë plumba në shpinë dhe në këmbë. I dyshuari është shqiptari Kasander Noga, 44 vjeç,”, raporton këtë të Hënë media belge “Het Laatste Nieuws”.
Krimi sipas të njëjtit burim, dyshohet se ka ardhur në vazhdën e konfliktit të vjetër që palët kanë me njera-tjetrën.
“Kasandri është i njohur për ‘vrasjen në repartin e reanimacionit ku u eleminua babai i Hasanbelliu. Një vit më vonë, familja Hasanbelliu qëlloi dhe vrau një mik të Kasanderit në një kafene në Antwerp. Vetë Kasander i mbijetoi atij sulmi”, raporton media belge.
Më 19 gusht të vitit 2000, Kasandër Noga hyri në Sanatorium në Tiranë dhe kreu atë që u quajt masakra e ‘Reanimacionit’ duke vrarë Aqif Hasanbelliun – babanë e Erionit dhe Dritan Hajdinin. Sipas raportimeve të kohës, ai u hoqi serumin nga krahu dhe me breshëri automatiku i la të vdekur në vend. Por kjo nuk është e vetmja ngjarje që akuzohet Kasandro Noga.
Sipas raportimeve, ai dyshohet për 5 vrasje dhe disa plagosje. Mes këtyre krimeve është dhe akuza për vrasjen e Astrit Shperdhejas në 25 gusht të 2001, ndërkohë që gjyqi u bë në Belgjikë në 2005. Po ashtu ai është dënuar edhe për vrasjen në vitin 1999 në Patos, të Kastrito Gropa dhe Edison Meminajt. Pavarësisht këtyre krimeve të rënda, vijon të jetë në arrati.
