Kombëtarja shqiptare nuk ka shkuar më shumë se barazimi pa gola ndaj Estonisë në miqësoren e zhvilluar në “Air Albania”
Estonia i rrëmbeu një barazim pa i vjedhur asgjë skuadrës së Edoardo Rejës që nuk krijoi pothuajse asgjë për të merituar diçka më shumë. Asnjë gol dhe një skuadër pa dëshirë për të fshirë disi humbjen ndaj Izraelit apo barazimin ndaj Islandës në Ligën e Kombeve.
E nisi me dy risi shumë të mëdha Reja që ia besoi një vend në mbrojtje të riut Bajrami, debutues me Kombëtaren dhe Enis Çokajn e rreshtoi në mesfushë me Ramadanin e Çekiçin.
Vrioni dhe Seferi u zgjuan vetëm pas 20 minutave lojë të përgjumur. Shqipëria me pak forcë e dëshirë ndërsa Estonia e tërhequr e gjitha në mbrojtje e me dëshirën e madhe për të mbrojtur me të gjitha forcat.
Rastin ideal Vrioni e pati në minutën e 32 por sulmuesi më i mirë i Bundesligës Austriake nuk arriti shënonte ndërsa pjesa e parë ishte vetëm kaq për kuqezinjtë që lëshuan terren në minutat e fundit.
Broja dhe Uzuni në pjesën e dytë e bënë më ritmike ndeshjen për kuqezinjtë që shtuan forcat në sulm pasi Vrioni vazhdoi të qëndronte.
Ndeshje shumë e lexueshme për Shqipërinë që nuk arriti të prodhonte lojë të shpejtë dhe me fantazi ku problemet më të mëdha i reflektoi sërish mesfusha duke mos krijuar vizion loje.
Pas një goditjeje të rrezikshme të Çekiçit, rastin e artë e pati Estonia me Pum që mund të kishte ngrirë skuadrën tonë ndërsa Reja hodhi në fushë Abrashin për të balancuar skuadrën.
Një shans edhe për Muçollin ndërsa në sulm Uzuni kërkoi të bënte gjithçka vetë. Estonia rrezikoi sërish 14 minuta nga fundi me Petson ndërsa deri në fund ndeshja nuk dhuroi asnjë shkëndijë. Shqipëria dhuron një paraqitje të dobët edhe ndaj një kundërshtari që renditet në vendin e 110 të klasifikimit të FIFA-s dhe e mbyll qershorin pa asnjë fitore e shumë zhgënjim.
