Prej dy muajsh në përgjim nga skuadrat e San Benedeto del Tronto. Duket se ish-kryebashkiaku i Vorës, Agim Kajmaku, i cili u arrestua në operacionin e 26 majit 2022 në Itali me 20 kg kokainë me njv vlerë tregu prej 1 mln euro, kishte ngjallur dyshime te autoritetet italiane, përderisa ishte vendosur nën përgjim dhe survejim nga anti-droga.
Gjykata ka caktuar masën e sigurisë me burg për Kajmakun dhe nipin e tij, ndërsa avokati i të arrestuarve ka kërkuar provat.
“Për masën e sigurisë gjyqtari zgjodhi atë më të rëndën, burgun, duke pasur parasysh ashpërsinë dhe sasinë e drogës së sekuestruar. Jemi në pritje të arsyeve e të vlerësimeve”, ka thënë avokati.
Vetë Kajmaku sipas raportimeve nuk ka folur para gjykatës, për shkak të mungesës së njohurive të gjuhës italiane.
Kajmaku u arrestua bashkë me nipin e tij, në një fidanishte në qytezën Grotamare, ku kishte shkuar për të blerë bimë që rriten në vazo. Por brenda vazove ishte fshehur droga, atje ku u gjet edhe nga policia në ndërhyrjen e befasishme që bëri.
Sipas mediave italiane, pronari i fidanishtes ka ngritur dyshime te autoritetet policore pasi ka parë zëvendësimin e bimëve me drogën.
Dyshohet se ish kryebashkiaku së bashku me nipin e tij ishin pjesë e një grupi trafikantësh që tregtonin kokainë.
Hetimet e koordinuara nga Prokuroria e Fermos, vijojnë për të zbuluar origjinën e sasisë së madhe të kokainës, rreth një milion euro dhe destinacionin e saj. Sipas mediave italiane Kajmaku bashkë me nipin përdornin një Volkswagen Polo nga një kompani vendase për të udhëtuar, kishin bërë një inspektim në fidanishte për dy ditë rresht dhe kishin zgjedhur një numër bimësh të vogla të cilave kërkonin t’u ndryshonin vazon duke vendosur më të mëdha. Një punonjëse e fidanishtes kishte vënë re edhe shenja të lëna në sipërfaqen e dheut.
Kur kjo iu komunikua karabinierëve, nga vazot u shfaqën qese të mbushura me kokainë, por nuk dihet se me çfarë mjetesh do t’i kishin transportuar bimët.
Furgoni është vënë re nga hetuesit jo shumë larg fidanishtes ku u zhvillua operacioni antidrogë.
Pas arrestimit, drejtues të hetimit kanë kërkuar informacione autoriteteve shqiptare në lidhje me këtë shtetas i cili ka qenë ndër personat më të rinj që i është bashkuar grupit.
Më herët forcat e sigurisë kishin instaluar kamera në disa nga rrugët dhe lagjet ku më parë kishin mbledhur informacione në rrugë operative lidhur me takime të dyshimta.
