Nga Boldnews.al
Shoqëria shtetërore që menaxhon hapësirën ajrore shqiptare, “Albcontrol”, po “menaxhon” edhe punonjësit, të cilët kanë paga mijëra euro. Skandali i pagave të këtyre punonjësve, i bërë publikë gjatë pandemisë, nxori zbuluar edhe benefitet e tjera.
Ata paguheshin për orët shtesë, ndërsa ndërmarrja u ka bërë edhe palestër, apo paguan qindra mijëra euro për t’u pastruar ambientet. Por, punonjësit apo drejtuesit e kësaj firme, shkojnë edhe në pushime me paratë e firmës shtetërorë. Ndërkohë, në këto radhë, BoldNews.al do të ndalet edhe të trajnimet e stafit, pasi drejtorët e “Albcontrol” bëjnë herë pas here tendera për trajnime apo edhe për kurse anglishteje.
Sipas dokumenteve që disponon BoldNews.al, “Albcontrol” ka hapur tenderin me procedurën e hapur, ndërmjet kufirit të ulët dhe të lartë monetar. Bëhet fjalë për procedurën me REF-32381-06-09-2022 dhe me objekt “trajnim /testim anglisht ATSEP /AIS”. Fondi limit i këtij tenderi është 16,666,666 lekë pa TVSH, ose me TVSH shuma shkon në rreth 160 mijë euro.
Një shumë e konsiderueshme, pasi nisur edhe nga objekti bëhet fjalë për trajnim apo për t’u mësuar anglishten këtyre punonjësve. Në dokumente thuhet se kohëzgjatja e kontratës/marrëveshjes kuadër ose afati për zbatimin e saj është 9 muaj. Tenderi do të bëhet në datën 27 qershor 2022, ndërsa do të implementohet në muajt në vijim.
Në dokumentet shoqëruese, të siguruara nga BoldNews.al, thuhet se “ALBCONTROL SH.A. kërkon kryerjen e kursit të gjuhës angleze të aviacionit për personelin ATSEP (Inxhiniero-teknik) në përputhje me standartet e vendosura nga ICAO dhe kërkesat lokale të përputhshmërisë”.
Sipas saj, gjithashtu ALBCONTROL SH.A. kërkon kryerjen e kursit të gjuhës angleze të aviacionit për personelin Specialist të AIS-it në përputhje me standartet e vendosura nga ICAO. “Pjesëmarrësit në këtë kurs janë personel i ALBCONTROL SH.A. (ATSEP dhe specialistë të AIS-it). Numri i pjesëmarrësve ATSEP: 25 (njёzet e pesë) ATSEP. Numri i pjesëmarrësve specialist të AIS: 19 (nëntё-mbё-dhjetё) specialistë”, thuhet në këto dokumente.
Sipas dokumenteve, kursi do të jetë 5 (pesë) ditë pune dhe test, e njëjtë për të gjithë kandidatët. “Kursi do të zhvillohet nё 2 grupe, me nga 12 dhe 13 ATSEP për grup, kurse Specialistët e AIS nё 2 grupe me nga 6 në grup dhe një grup me 7. Periudha e përshtatshme për zhvillimin e kursit është qershor – shtator 2022. Orari i përshtatshëm për zhvillimin e kursit është 09:00 AM – 17:00 PM“, thuhet në këto dokumente.
