Partizani niset pas pak ditësh drejt Sllovenisë ku klubi kryeqytetas do të zhvillojë fazën përgatitore ku trajneri Dritan Mehmeti do të ketë mundësinë që të përgatitë ekipin për pjesëmarrjen në Ligën e Konferencës edhe falë disa ndeshjeve miqësore që janë planifikuar gjatë qëndrimit atje.
Klubi ka bërë zyrtare në rrjetet sociale edhe tre ndeshjet miqësore që ka planifikuar në këto ditë qëndrimi atje, duke zgjedhur edhe ekipe mjaft të forta për të parë gjendjen e skuadrës. Sfida e parë është më datë 18 qershor ndaj NS Mura, një ekip mesi tabele në kampionatin slloven të futbollit.
Më datë 22 qershor është planifikuar një ndeshje ndaj ekipit të Jadran Dekani, i cili militon në kategorinë e dytë të kampionatit vendas. Ndërsa sfida e tretë është prova e vërtetë, pasi përballë është Maribori, më 29 qershor. Kampionët e Sllovenisë janë edhe ata në fazë përgatitore në këtë periudhë për pjesëmarrjen në Ligën e Kampioneve dhe për Partizanin do të jetë një mundësi e mirë që të testojë veten para kthimit në Shqipëri.
