Një person, i cili ka mbetur i plagosur rëndë në lagjen Place De Brouckère, në Belgjikë, dyshohet se është shqiptari Erion Hasanbelliu.
Nga raportimet mësohet se ai është qëlluar 6 herë me plumba pas shpine. Policia belge ka identifikuar autorin dhe e ka shpallur në kerkim.
Nga raportimet, autori dyshohet se është një tjetër shqiptar.
Ndërkohë duke folur menjëherë pas njoftimit të policisë, kryebashkiaku i Brukselit Philippe Close dënoi ngjarjen dhe siguroi se policia po bën gjithçka që mundet për të garantuar sigurinë e vizitorëve në kryeqytet.
“Shpresoj që policia të mund të arrestojë autorët sa më shpejt të jetë e mundur. Janë mobilizuar shumë patrulla. Dua të theksoj se të gjithë duhet të jenë në gjendje të ndihen të sigurt në Bruksel dhe ne po bëjmë gjithçka që mundemi me ndihmën e shërbimeve të policisë”.
Çfarë u raportua lidhur me ngjarjen
Një burrë u qëllua të shtunën në mbrëmje në lagjen Place De Brouckère në zemër të Brukselit, konfirmoi shërbimi i policisë Bruksel-Ixelles. Forcat e sigurisë janë në kërkim të autorit(ve).
Shërbimet policore janë njoftuar për ngjarjen rreth orës 20:20 pas thirrjeve në numrin e urgjencës 100.
Dëshmitarët raportuan një sërë të shtënash në qendër të kryeqytetit.
Rreth e rrotull “Place De Brouckère” u instalua një perimetër sigurie. Nuk dihen rrethanat e sakta të të shtënave, si dhe identiteti i personit, një 43-vjeçar i cili ka marrë gjashtë të shtëna në trup, shpinë dhe këmbë, raportojnë mediat lokale.
Zyra e prokurorit publik të Brukselit e ka marrë rastin. Policia thotë se po përdor mjetet maksimale për gjetjen e autorit(ve) të të shtënave.
