Në komunikimin e përjavshëm me gazetarët, ish-kryeministri Sali Berisha u shpreh se Shqipëria u kthye në një sistem monist me zgjedhje e presidentit nga ana e PS-së.
Berisha gjithashtu i bëri thirrje shqiptarëve që me potencialin e tyre të shpëtojnë Shqipërinë nga sistemi që ai e cilëson monist.
”PD i bën thirrje qytetarëve shqiptarë në këtë situatë politike të ngrihen në mbrojtje të idealeve të tyre demokratike për të shpëtuar Shqipërinë nga regjimi monist i Edi Ramës. Zgjidhja është sot më shumë se kurrë në duart e qytetarëve shqiptarë. Të atyre të cilët e duan këtë vend, konsiderojnë lirinë e qytetarëve shqiptarë si premisën më jetike për zhvillimin e vendit të tyre. Në këtë kontekst PD konsideron jetike krijimin në këtë moment kritik të një froni opozitar për shpëtimin Shqipërisë të përbërë nga të gjitha forcat politike të vërteta opozitare, shoqëri civile, personalitete kundërshtare të regjimit, grupe interesi, sindikatat, rrethit akademik, të gatshëm për tu përballur me regjimin monist të Edi Ramës”,- theksoi ai.
