Nga Boldnews.al
Situata e zjarreve në Shqipëri ka nxjerrë në pah skandalin me helikopterët e flotës ajrore, e cila, megjithëse është e një vendi të NATO-s, lë shumë për të dëshiruar.
Gjatë këtyre viteve janë blerë disa helikopterë “Cougar”, me vlerë dhjetëra miliona euro. Madje, gjatë kësaj kohe janë shpenzuar miliona euro të tjera, me kontrata të dyshimta në Francë, Itali apo edhe në vende të tjera. Rezultati: 0!
Helikopterët që duhet të mirëmbaheshin nuk janë në gjendje pune, teksa ministri Peleshi, apo edhe zyrtarë të ministrisë së Mbrojtjes dhe Emergjencave “krekosen” sa herë dalin në televizor. Madje, nxjerrin edhe “fajtorët” e zjarreve në vend, ku fotografinë e një punonjësi të zjarrfikëses, në mes të shkurreve, e nxjerrin sikur të jetë ai fajtori për vënien e zjarrit!
Një paradoks i madh, pasi punonjësi po mundohej me shkurre dhe degë peme për të “mbuluar” miliona euro për mjetet ajrore, të cila duhet të ishin në gatishmëri për këto zjarre.
Sipas dokumenteve që disponon BoldNews.al, një institucion në varësinë direkte nga Ministria e Mbrojtjes, ka hapur një tender për “blerje materiale për Flotën Luftarake”. bëhet fjalë për tenderin e autoritetit kontraktues Reparti Ushtarak Nr.2001, komanda e Forcave Detare Durrës. Në dokumente thuhet se fondi limit i këtij tenderi është 45.572.433 lekë pa TVSH, ose rreth 500 mijë USD.
Mësohet se tenderi do të bëhet në muajin korrik, ndërsa me këto para do të blihen bojëra vaji dhe uji, bateri alkaline, pjesë për avionë, anije dhe helikopterë. Pra, edhe pjesë për helikopterë! Por, për kë? Për ata që janë në hangar në Shqipëri apo për atë që vijon të qëndrojë në Itali?!
Në dokumente thuhet se do të blihen edhe pajisje për porte, pajisje kontrolli, sigurie ose sinjalizimi për lundrim në ujërat e brendshme, filtra ajri, filtra vaji, filtra nafte dhe filtra të tjerë. Por, me këto para dhe pajisje, a mund të bëjmë “luftë” me cilindo?!
