Kryeministri Edi Rama dhe Presidenti serb Aleksandër Vuçic u kujdesën të theksonin nga konferenca për mediat pas mbledhjes së “Open Balkan”, se “Ballkani i Hapur” nuk është projekt rus dhe as i mbështetur nga Rusia.
Reagimi vjen pasi ministri i Jashtëm rus, Sergei Lavrov deklaroi disa ditë më parë se vendet perëndimore urdhëruan bllokimin e udhëtimit të tij në Beograd, për të mos lejuar që ai të mbështeste këtë nismë.
“Bëhet fjalë për një peshkaqen të nivelit shumë të lartë në oqeanin e diplomacisë botërore, i cili është i mirënjohur për sarkazmat e tij dhe shumë peshq kanë rënë në rrjedhën e trukeve të tij. Sepse nëse ai do të ishte mbështetës i Ballkanit të Hapur do të ishte këtu. Ai do të ishte ai mbështetës dhe Shtetet e Bashkuara dhe BE-ja që nuk e duan Ballkanin e Hapur janë këtu. Këtë e hanë vetëm peshqit e Ballkanit të Mbyllur. Ballkani i Hapur është për njerëzit”, tha Rama.
Nga ana tjetër Vuçiç tha se Ballkani i Hapur ka qenë ide e tij, Edi Ramës dhe ish-kryeministrit maqedonas Zoran Zaev. Dhe sipas tij, nisma i shërben qytetarëve.
“Jam krenar me politikën që bën Serbia, nuk kam turp nga marrëdhëniet që kemi me Federatën Ruse. Por askush tjetër nuk ishte përveç nesh në përgatitjen e idesë së Ballkanit Perëndimor”, shtoi Vuçiç.
