Pronari i një lokali në Durrës është arrestuar nga policia pasi akuzohet për përshtatje të lokalit për përdorim të lëndëve narkotike dhe për gjenerim të kriptomonedhave (Bitcoin).
Blutë kanë zbuluar se ai mbante në lokalin në pronësi të tij, edhe sasi kafeje të dyshuar të kontrabanduar.
Aksioni
“Specialistët për Hetimin e Trafiqeve të Paligjshme dhe Narkotikëve në DVP Durrës, në bashkëpunim me Forcën e Posaçme ‘Shqiponja’, bazuar në informacionet e siguruara në rrugë operative se një shtetas kishte përshtatur lokalin në pronësi të tij, për përdorim të lëndëve narkotike dhe për gjenerim të monedhave virtuale (Bitcoin), organizuan dhe finalizuan operacionin policor të koduar ‘Multifunksional’, si rezultat i të cilit u arrestua në flagrancë shtetasi A.K., 31 vjeç, banues në Durrës”, njoftoi policia.
Ai akuzohet për veprat penale “Përshtatja e lokalit për përdorim droge”, “Prodhimi dhe shitja e narkotikëve”, “Fshehja e të ardhurave”, “Kontrabanda me mallra për të cilat paguhet akcizë”, “Ruajtja apo depozitimi i mallrave kontrabandë”, si dhe “Prodhimi, mbajtja, blerja apo shitja pa leje e armëve të ftohta”.
“Shërbimet e Policisë, gjatë kontrollit të ushtruar në lokalin në pronësi të shtetasit A.K., në lagjen nr. 4 Durrës, gjetën dhe sekuestruan në cilësinë e provës materiale, rreth 260 gr lëndë të dyshuar narkotike marijuanë, 18 pajisje që shërbejnë për gjenerimin e kundërligjshëm të kriptomonedhave, sasi kafeje të dyshuar të kontrabanduar, një sasi të vogël lëndë të dyshuar narkotike kokainë, 3 peshore elektronike dhe një shkop bejsbolli”, informon më tej policia.
Vijon puna për dokumentimin e plotë të veprimtarisë kriminale të këtij shtetasi, ndërsa materialet u referuan në Prokurorinë pranë Gjykatës së Rrethit Gjyqësor Durrës, për veprime të mëtejshme, mbyllet njoftimi.
