Një vrasje me thikë është shënuar në Sarandë këtë të Martë. Ngjarja ka ndodhur gjatë paradites në shëtitoren e Sarandës, ku Jorgo Golemi goditi me thikë 43-vjeçarin Kledi Koka, i cili humbi jetën në spital.
Në një njoftim paraprak për ngjarjen, policia do të konfirmonte se ngjarja ndodhi “për motive të dobëta”. Blutë raportuan se nga goditja me thikë, 43-vjeçari mbeti i plagosur dhe u dërgua në spitalin e Sarandës.
Në një njoftim të dytë, policia lokale njoftoi vdekjen e Kledi Kokës pas plagosjes me thikë në kurriz dhe arrestimin e autorit.
“Në vijim të informacionit paraprak, përmes të cilit njoftuam se, në shëtitoren e Sarandës, gjatë një konflikti për motive të dobëta, shtetasi Jorgo Golemi goditi me mjet prerës, në kurriz, shtetasin Kledi Koka, 43 vjeç, sqarojmë se, si pasojë e plagëve të marra shtetasi Kledi Koka ka ndërruar jetë”, thuhet në njoftimin e bluve.
Policia, po ashtu, konfirmoi arrestimin e autorit si dhe sekuestrimin e thikës me të cilën u krye krimi.
Sipas burimeve policore, autori dhe viktima nisën të debatonin për vendin ku ankoronin varkat, pasi Golemi kishte varkë peshkimi, ndërsa Koka kishte varkë turistike. Në një moment, Golemi goditi me thikë Kokën.
