Shtetet e Bashkuara të Amerikës kanë sekuestruar dy avionë privatë të oligarkut rus Roman Abramovich me vlerë mbi 400 milionë dollarë për shkelje të ligjeve dhe sanksioneve të SHBA.
Avionët, një Gulfstream dhe Boeing 787-8 Dreamliner, i cili besohet të jetë një nga avionët privatë më të shtrenjtë në botë, janë aktualisht në Rusi dhe Dubai, sipas deklaratës së një agjenti të FBI-së për të mbështetur urdhrin e konfiskimit.
Departamenti Amerikan i Tregtisë njoftoi gjithashtu akuzat administrative kundër Abramovich. Nëse shpallet përgjegjës, dënimi maksimal mund të jetë sa vlera e avionëve, tha një zyrtar i administratës.
Veprimet e ndërmarra nga SHBA-ja janë pjesë e një përpjekjeje për të ndëshkuar rusët e njohur që janë afër Kremlinit dhe për të ushtruar presion ndaj ekonomisë së Moskës për t’i dhënë fund pushtimit në Ukrainë.
Ndërsa Abramovich nuk është sanksionuar nga Zyra e Departamentit të Thesarit të SHBA-së për Kontrollin e Pasurive të Huaja, një zyrtar i Departamentit të Drejtësisë së SHBA tha se urdhri i sekuestrimit tregon se “askush nuk është mbi ligjin dhe të mos jesh në listën e OFAC nuk të jep licencë për të shmangur sanksionet ose kontrollet e eksportit.”
