Paralelisht me mbledhjen e Këshillit Kombëtar të PD, i cili do të votojë për Sekretarin e Përgjithshëm, Nënkryetarët dhe Sekretariatin e kësaj partie, në selinë e Partisë Socialiste do të mblidhet kryesia e cila do të vendosë mbi kandidatin zyrtar të kësaj partie për postin e Presidentit të vendit.
Nga raportimet mësohet se në listën e kandidatëve janë 10 emra, ndërkohë që duket se i gjithë procesi po ruhet hermetikisht, pavarësisht se në media janë artikuluar disa prej kandidatëve të propozuar.
Ajo që dihet është se në orët e mbrëmjes Kryesia e PS pritet të zyrtarizojë një emër, i cili do ti paraqitet Grupit Parlamentar socialist dhe brenda mesditës së të shtunës do të depozitohet në Kuvend si kandidati zyrtar, për ti hapur rrugën zhvillimit të raundit të 4-t të zgjedhjes së Kreut të ri të Shtetit.
Në këtë raund, Presidenti zgjidhet me 71 vota, ndërsa socialistët dhe aleatët e tyre të PSD kanë në Kuvend 77 mandate.
