Patronazhistët, të cilët u përdorën nga socialistët në zgjedhjet e 25 prillit, konsiderohen si një punë. Ndoshta kjo është arsyeja që nga Kryeministri Edi Rama dhe me rradhë të gjithë socialistët dhe të rilindurit, flasin me bindje për uljen e papunësisë në vend.
Sekretari organizativ i PS-së, Blendi Klosi i ftuar në emisionin “Bardh a Zi”, pa iu dridhur zëri tha se ajo që ndodhi me patronazhistët është punë. Sipas tij, për të fituar duhet të punosh dhe PS ka filluar përgatitjet për garën e ardhme elektorale.
“Patronazhistët është një punë. Ajo që bëmë me patronazhistët është përsëri një punë. Duhet punuar që të fitohet, nuk punohet pa punë. Për atë votë duhet punuar që sot dhe ne Partia Socialiste po punojmë fort për garën e ardhshme elektorale.
Ne jemi sot në një proces përgatitjesh për garën e pushtetit lokal për një vit. Do thonë prapë pastaj, jo kështu jo ashtu, por ndërkohë nuk po punojnë për të na qenë përballë. Nëse bëni një emision me idenë që këtu çdo gjë është e vjedhur dhe kjo vota nuk ka vlerë. Gjeni hajdutin dhe bjerini hajdutit, nuk ka faj vota”, tha ai.
Ndoshta me këtë argument edhe Prokuroria nuk hetoi lidhur me të dhënat sensitive të qytetarëve të cilat u mblodhën nga “80 lekëshat” e PS-së, që duket se kanë zëvendësuar më së miri ish-fuksat e regjimit të PPSH-së.
