Ashtu sikundër pritej ka dështuar edhe raundi i 3-të për zgjedhjen e Presidentit, ndërsa deri në orën 16:00 nuk ka pasur asnjë emër të depozituar që mund të shërbente si kandidat për postin e Kreut të Shtetit.
Partia Socialiste kishte deklaruar se në raundet e para, atëherë kur duhen edhe 84 vota për zgjedhjen e Presidntit të vendit nuk do të paraqiste asnjë kandidat, ndërsa topin e ka hedhur nga opozita, duke i kërkuar kësaj të fundit të paraqiste emra, mbi të cilët mund të arrihej konsensusi.
Në fakt i gjithë procesi, që konsiderohej si negociatë mes Partisë Socialiste dhe Grupeve Parlamentare të opozitës ishte një farsë, për shkak jo vetëm të mungesës së vullnetit nga ana e mazhorancës, por edhe kushtit të vendosur prej saj që nuk kishte ndërmend të pranonte asnjë kandidat që kishte mbështetjen e “non grata-ve”, duke përjashtuar nga procesi kreun e PD-së, Sali Berisha, dhe mbështetës të tij.
Gjithsesi deri në momentet e fundit, socialistët arritën të mbajnë në lojë Enkelejd Alibeajn dhe disa prej deputetëve demokratë, të cilët mbështesnin këtë të fundit, duke krijuar idenë e një negociate reale apo përkushtimi që kishin socialistët për zgjedhjen e një Presidenti konsensual.
Të tre raundet e para janë konsumuar në Kuvend pa një kandidat, ndërsa pritet që në raundin e katërt socialistët të zgjedhin Kreun e ri të Shtetit me votat e tyre. Kryeministri Edi Rama ka deklaruar se emri që do të zgjidhet nuk është pjesë e Grupit Parlamentar, ndërsa Erion Veliaj, kryebashkiak i Tiranës, ka deklaruar se janë të paktën 10 kandidatë që do të diskutohen në Kryesinë e PS, ku edhe do të merret vendimi.
Pothuajse të gjithë emrat e artikuluar deri më tani janë jashtë loje, pasi një pjesë e madhe e tyre ose janë deputetë të PS ose pjesë e stafit të ngushtë të Kryeministrit, i cili në deklarimet e ndryshme publike, i ka përjashtuar si mundësi. Në dallim nga proceset e mëparshme të zgjedhjes së Presidentit, ajo që bie në sy aktualisht që fakti se publikut i janë mbajtur të fshehur kandidatët realë në garë, edhe pse që nga dita e parë është deklaruar se Presidenti i ri i vendit do të zgjidhet nga socialistët.
Pritet që ditën e hënë, Kuvendi të formalizojë raundin e 3-të, ndërsa të martën Konferenca e Kryetarëve pritet të caktojë datën e mbajtjes së raundit të 4-rt, që në bazë të Kushtetutës duhet të zhvillohet brenda 7 ditëve nga raundi i 3-të. Pra me shumë gjasa data 6 qershor, pritet të jetë dita kur socialistët do të paraqesin në Kuvend emrin e kandidatit për President, ndërsa votimi do të jetë i fshehtë dhe me kuti.
Për zgjedhjen e Kreut të ri të Shtetit në raundin e 4 mjaftojnë 71 vota, ndërsa socialistët kanë në Kuvend 74 të tilla, shto edhe 3 deputetë të PSD, pra 77 mandate.
