Një 35-vjeçar është arrestuar nga policia e Tiranës pasi ishte shpallur në kërkim për drogë.
“Shërbimet e Komisariatit të Policisë Nr. 6, bazuar në informacionet e marra në rrugë operative për vendndodhjen e një shtetasi të shpallur në kërkim, në vijim të operacionit policor të koduar ‘Camel’, bënë kapjen e shtetasit V.M., 35 vjeç, banues në Tiranë, i shpallur në kërkim për veprën penale ‘Prodhimi dhe shitja e narkotikëve’, kryer në bashkëpunim”, njoftoi policia.
“Ky shtetas ishte shpallur në kërkim në kuadër të operacionit “Camel” të organizuar në shtator të vitit 2021, si rezultat i të të cilit u arrestua në flagrancë bashkëpunëtori i 35-vjeçarit, shtetasi F M., 37 vjeç. Gjatë kontrolleve të banesave të këtyre dy shtetasve, shërbimet e Policisë gjetën dhe sekuestruan, në cilësinë e provës materiale, 84 pako me lëndë të dyshuar cannabis sativa, në formë çokollate, me peshë 21 kg”, shtuan të njëjtat burime.
Gjykata e Shkallës së Parë Tiranë i ka caktuar shtetasit V.M. masën e sigurisë “Arrest në burg”, për veprën penale “Prodhimi dhe shitja e narkotikëve”, kryer në bashkëpunim.
