Testimi psikologjik i punonjësve të policisë është kthyer në vëmendje pas ngjarjes së rëndë të ndodhur pak ditë më parë ku efektivi Ludian Zaimi qëlloi për vdekje kolegun e tij Çaush Saliasi brenda komisariatit nr 3.
Ish-drejtuesi të policisë thonë se shumë prej punonjësve që shërbejnë në radhët e uniformave blu vuajnë nga porblemet e ankthit dhe depresionit.
Fatjon Softa thotë se problemet ekonomike si dhe oraret e tejzgjatura në punë ndikojnë në gjendjen emocionale dhe psikogjike të punonjësve të policisë.
“Ky person apo disa persona si ai përdorin lëndë narkotike, përdorin medikamente për shkak të streseve që kanë sepse janë faktorët ekonomike, oraret e tejzgjatura. Por të ndodhë kjo gjë te një 25-vjeçar, vajmedet te një 50-vjeçar apo dikush që është në fund të karrierës”.
Softa sugjeron kontrolle më të shpeshta të punonjësve të policisë pas mbarimit të studimeve dhe daljes në terren.
Gjatë përballjes me situata të vështira shpesh herë punonjësit e policisë kanë tejkaluar kompetencat.
“Tu japësh armën në dorë disa personave dhe ta përdorin atë vend e pa vend. Sot e përdorin në komisariat, nesër mund ta përdorin në familje, pasnesër në një komunitet. Kur acarohet nga një koleg i tij, mendo sesi mund të acarohesh me atë që je përballë në një demonstratë, në një protestë, si mund të jesh përballë dikujt që ka vetë probleme.”
Agjencia e Mbikqyrjes Policore po vijon hetimet në lidhje me vrasjen brenda komisariatit nr.3, duke marrë në pyetje kolegët e dy efektiveve të përfshirë.
Autori i krimit Ludian Zaimi është shprehur se viktima e bullizonte prej kohësh dhe për këtë arsye kishtë filluar përdorimin e disa medikamenteve për ankthin dhe stresin.
