Përfshihet nga flakët një magazinë në fshatin Burimas të bashkisë së Maliqit. Sipas shërbimit zjarrfikës të kësaj bashkie zjarri ka përfshirë të gjithë sipërfaqen e magazinës duke e djegur plotësisht.
Magazina kishte brenda saj materiale bujqësore përfshi dhe ambalazh kartona e arka, çka kanë ndihmuar në përhapjen e zjarrit në të gjithë sipërfaqen e brendshme të kësaj magazine.
Ndërhyrja në kohën e duhur e zjarrfikësve ka bërë të mundur izolimin e flakëve duke shpëtuar kështu nga zjarri banesat që ndodheshin fare pranë magazinës.
Paraprakisht dyshohet se zjarri mund të jetë shkaktuar nga një shkëndijë elektrike.
