Nga Boldnews.al
Arens Çela është kandidati i vetëm për pozicionin e drejtuesit të Prokurorisë së Tiranës, pasi Këshilli i Lartë i Prokurorisë skualifikoi me unanimitet votash aplikantin tjetër, Kreshnik Ajazi.
KLP konstatoi se kandidati Ajazi nuk mund të vijonte garën, pasi është aktualisht në pozicion drejtues prokurorie, në Elbasan.
Këshilli i Lartë i Prokurorisë shpalli rreth 3 javë më parë garën për drejtues të Prokurorisë së kryeqytetit, pas shkarkimit të ish-titullares, Elisabeta Imeraj.
Prokurorët Çela dhe Ajazi shprehën interesin për të plotësuar vendin vakant.
Këshilli i Lartë i Prokurorisë, në prani të 9 anëtarëve dhe në mungesë të këshilltares Esmeralda Keshi, shqyrtoi paraditen e së Enjtes kriteret formale të dy kandidatëve.
Në përfundim, KLP, me 9 votat e pranishme në seancë kualifikoi z. Arens Çela për të vijuar garën për ngritje në detyrë dhe po me 9 vota vendosi skualifikimin e aplikantit tjetër, Kreshnik Ajazi.
Skualifikimi i Ajazit
Komisioni për Zhvillimin e Karrierës në Këshillin e Lartë të Prokurorisë i prezantoi anëtarëve të tjerë relacionin për dy kandidatët për drejtues të Prokurorisë së Tiranës.
Relatorja Eloida Goxhi deklaroi se kandidati Arens Çela i plotëson të gjithë kriteret formale dhe ligjore për të vijuar procedurën e ngritjes në detyrë.
Ndërsa, sa i përket aplikantit tjetër, Kreshnik Ajazi, relatorja Goxhi deklaroi se Komisioni i Karrierës është i mendimit që ai nuk mund të kualifikohet.
Aplikanti Kreshnik Ajazi është aktualisht drejtues i emëruar në Prokurorinë e Elbasanit për një mandat 3-vjeçar.
Pra, rezulton se ai ka përfituar “ngritje në detyrë” në nivelin e prokurorive të shkallës së parë.
Duke analizuar kuadrin ligjor, relatorja deklaroi se aplikimi i Ajazit nuk është “ngritje në detyrë”, por “lëvizje paralele”, pasi kandidimi i tij synonte që të emërohej në një pozicion të të njëjti nivel me atë që mban aktualisht.
Relatorja shpjegoi gjithashtu se, në kushtet aktuale, prokurori Ajazi mund të përfshihet në procedurë të “ngritjes në detyrë” vetëm nëse aplikon për një pozicion më të lartë, në nivel Apeli apo pranë Prokurorisë së Posaçme.
Legjislacioni është i qartë dhe ai nuk parashikon “lëvizje paralele” për drejtuesit e prokurorive.
Prokurorët e shkallës së parë që kanë ushtruar detyrën e drejtuesit mund të aplikojnë sërish për një pozicion të tillë vetëm në rastet kur e kanë mbaruar mandatin dhe kanë statusin e magjistratit të thjeshtë.
Pas relatimit, anëtarët e Këshillit të Lartë të Prokurorisë e gjetën të drejtë dhe të saktë argumentimin ligjor, duke vendosur në unanimitet kualifikimin e prokurorit Arens Çela dhe skualifikimin, po me unanimitet, të aplikantit tjetër, Kreshnik Ajazi.
