Mediat ndërkombëtare vazhdojnë që të shkruajnë për dhunën që tifozët e Romës dhe të Feynord kanë shfaqur në rrugët e Tiranës.
Gjigandi mediatik BBC shkruan se 19 efektivë të policisë shqiptare janë plagosur gjatë përleshjeve që kanë ndodhur në kryeqytetin shqiptar.
BBC shton se përplasjet mes tifozëve dhe policisë kanë ndodhur përpara se të zhvillohet finalja e Conference League në Shqipëri.
“Tifozët kanë përdorur shishe qelqi, shkopinj, gurë dhe objekte të tjera ndërsa policia lokale u përpoq të neutralizonte turmat e dhunshme. Në orët e para të mëngjesit të sotëm u deportuan – nëpërmjet portit detar të Durrësit – 80 tifozë huliganë italianë”, shkruan BBC.
Në të dhënat e publikuara nga media e njohur e huaj, referimet janë marrë nga policia shqiptare.
“Policia vendase kishte thënë më herët se 60 individë – 48 italianë dhe 12 holandezë janë shoqëruar në komisariatin e policisë si pasojë e përleshjeve”, thuhet gjithashtu në artikull.
Edhe mediat italiane e ata holandeze kanë shkruar për dhunën në Tiranë, por kryesisht duke bërë fajtor tifozëritë kundërshtare për aktet vandale.
