Nga Boldnews.al
Kompania “Studio-Rebus”, me ortake kryesore Ilirjana Bozo, vajzën e deputetes Luljeta Bozo, është tërhequr nga nënshkrimi i kontratës me vlerë 100 milionë lekë të vjetra për projektimin e godinës së re të Fakultetit të Studimeve Profesionale në Universitetin e Durrësit.
Institucioni arsimor ka njoftuar se “Studio-Rebus” është shpallur fituese, por ajo ka njoftuar zyrtarisht se nuk pranon të nënshkruajë kontratën.
Njoftimi nuk shoqërohet me arsyet e tërheqjes së shoqërisë private, megjithëse fondi që do të përfitonte ishte i konsiderueshëm.
Megjithatë, duket se “Studio-Rebus” ka reflektuar pas raportimit të publikuar për herë të parë në “Boldnews.al” dhe që më tej mori shpërndarje mediatike, lidhur me zhvillimin e tenderit në shkelje të ligjit “Për parandalimin e konfliktit të interesave”.
Në fund të Prillit 2022, Universiteti “Aleksandër Moisiu” në Durrës shpalli rezultatet paraprake të tenderit me fond limit 90 milionë lekë të vjetra pa TVSH, e cila, së bashku me TVSH kalonte shumë e 100 milionë lekëve të vjetra.
Në bazë të atyre rezultateve, fituese ishte studio arkitekturore “Studio-Rebus”.
“Boldnews.al” ngriti dyshimet se ky tender është zhvilluar në kushtet e konfliktit të interesave.
Ligji “Për parandalimin e konfliktit të interesave” parashikon rregulla të ngurta për zyrtarët me funksion “deputet”.
Atyre dhe familjarëve të tyre të afërt, përfshirë bashkëshortët dhe fëmijët madhorë, nuk u lejohet të përfitojnë tendera nga asnjë institucion shtetëror dhe publik në të gjithë territorin e Shqipërisë.
Por, mesa duket, Universiteti publik i Durrësit nuk e ka pasur të qartë këtë ndalim ligjor dhe ka zhvilluar i pashqetësuar procedurat, duke shpallur fitues të tenderin 100 milionë lekë të vjetra studion që zotërohet në 50 përqind të aksioneve nga Ilirjana Bozo, vajza e deputetes Luljeta Bozo.
Në përfundim të të gjithë procedurave, ‘Studio-Rebus” është shpallur sërish fituese.
Por, siç informon Universiteti i Durrësit, “shoqëria “STUDIO – REBUS” sh.p.k ka njoftuar tërheqjen nga procedura e prokurimit me objekt “Studim Projektim i Godines se re te Fakultetit te Studimeve Profesionale” si dhe tërheqjen nga nënshkrimi i kontratës për këtë procedurë”.
Lexo edhe:
Dyshimet/ Vajza e deputetes Luljeta Bozo fiton tender 100 mln lekë në kundërshtim me ligjin
