Ministri i Jashtëm i Greqisë, Nikos Dendias, e ka nisur vizitën e tij zyrtare në Shqipëri, me një takim me kreun e OMONIA-s, Fredi Beleri, me të cilin thonë se ka diskutuar në lidhje me çështjet e minoritetit në Shqipëri.
“Në nisje të vizitës sime në Tiranë, u takova me Presidentin e degës së Omonias në Himarë, Fredi Bejleri, i cili më informoi për çështjet e minoritetit grek në Shqipëri”, shkruan Dendias në postimin e tij në Tuitter.
Gjatë vizitës së tij në Tiranë, ministri i jashtëm grek do të takohet me homologen e tij Olta Xhaçka, si dhe me kryeministrin Edi Rama.
Fokusi i takimit sipas mediave fqinje, pritet të jetë stabiliteti i rajonit të Ballkanit Perëndimor, në një kohë që situata pas luftës në Ukrainë, ka rritur klimën e tensioneve.
Ndërkohë PDIU kërkoi nga qeveria shqiptare që në takimin me Dendias të shtrohen dy kërkesa, ajo për heqjen e ligjit të luftës si dhe futja e çështjes çame në axhendën e diskutimit mes dy vendeve.
