Zbardhen të tjera detaje nga dosja hetimore e SPAK, në lidhje me krimet ku është përfshirë i penduari i drejtësisë, Nuredin Dumani.
Sipas gazetares Klodiana Lala, e cila raportoi për BalkanWeb dhe NEWS24, duke iu referuar dosjes hetimore, rezulton se Ervis Martinaj ka porositur vrasjen e Endrit Dokles.
Dokle, rezulton i dënuar për veprat penale “Krijim i organizatës kriminale”, “Vrasja me paramendim”, e kryer në bashkëpunim, e mbetur në tentativë, “Rrëmbimi ose mbajtja peng e personit”, kryer në bashkëpunim, në kuadër të organizatës kriminale.
Ndonëse ai i ka dhënë një shumë prej 100 mijë eurosh Dumanit, ky i fundit nuk ka pranuar që të eliminojë Doklen. Po ashtu, një tjetër detaj tronditës nga bota e krimit, e shkruar në dosjen hetimore tregon se Florenc Çapja ka porositur vrasjen e Sokol Sanxhaktarit, dhëndrit të ish-kryebashkiakut të Elbasanit, Qazim Sejdinit.
Po ashtu, Lala duke iu referuar dosjes hetimore të SPAK, thekson se Talo Çela akuzohet se vrau Fatmira Deden, ndërkohë që në kërkim është dhe Festim Çoli. Një tjetër krim që i është kërkuar të kryhet nga Dumani është dhe porosia që ka bërë Suel Cela, i cili i ka kërkuar që të vrasë një biznesmen. Ndërkohë, vrasjen e Emiljano Ramazanit e dyshohet se e ka kryer Skerdi Tasi, ndërsa shofer ditën kur ndodhi ngjarja ishte Henrik Hoxha.
Me sa duket ka qenë pikërisht dëshmia e Nuredin Dumanit ajo që ka zbërthyer botën e nëndheshme të krimit në Shqipëri që solli sot një megaoperacion për goditjen e 8 grupeve kriminale, 4 në Elbasan, 3 në Tiranë dhe 1 në Durrës.
Gjithashtu BalkanWeb ka publikuar pamje nga sendet e paligjshme të sekuestruara në kuadër të megaoperacionit për goditjen e 8 grupeve kriminale, 4 në Elbasan, 3 në Tiranë dhe 1 në Durrës.
Siç shihet në foto, policia gjatë kontrolleve të ushtruara në një dhomë hoteli, ka gjetur sende të paligjshme, mes tyre një kallashnikov, që e kishte në një tavolinë ku brenda saj kishte një sirtar të padukshëm.
Në këtë sirtar kishte duke nisur nga targa të huaja, kallashnikov, municione, dhe pajisje të tjera që përdoren për krime. Po ashtu mes këtyre sendeve është dhe një parfum Tom Ford.
