Dean Liço ishte një nga lojtarët e afruar te Partizani në merkaton e verës së shkuar. Mesfushori 22-vjeçar u huazua nga Ascoli në kampionatin italian. Me ish-trajnerin Ilir Daja nuk arriti të kishte shumë minuta, ndërsa me Dritan Mehmetin në ndeshjet e zhvilluara ka treguar cilësi dhe performancë mjaft pozitive.
Shtatlarti i mesfushës është pjesë e kombëtares së moshave. Dhe siç bëhet me dije për Newsport.al, disa klube të elitës e kanë “shënjestruar” për ta pasur në gjirin e tyre. Megjithatë problem mbetet kontrata me Ascolin. Fillimisht ai duhet t’i japë fund marrëveshjes formale me italianët, teksa këta të fundit janë në “Play-Off” për t’u ngjitur në Seria A.
Duhet theksuar fakti se menaxherët përtej Adriatikut po punojnë teksa janë në negociata me disa klube në Itali dhe Portugali. Pritet me interes të shihet se cila do të jetë e ardhmja e 22-vjeçarit të Partizanit, që këtë sezon është aktivizuar në 13 ndeshje në total, ku ka dhënë edhe një asist.
