Futbollisti me origjinë shqiptare, Granit Xhaka ka kritikuar publikisht bashkëlojtarët e tij të Arsenal pas disfatës së mbrëmshme ndaj Newcastle (2-0) për shkak të së cilës klubi londinez ka komplikuar situatën në përpjekje për t’u kualifikuar në Ligën e Kampionëve sezonin e ardhshëm.
Topçinjtë i kishin të gjitha në dorë dhe dukej se për herë të parë pas gjashtë vitesh do të arrinin të fitonin një vend në Champions League, por humbjet në ndeshjet me kundërshtarë më të lehtë me shumë gjasa do t’u kushtojë vendin e katërt.
“Nga minuta e parë deri në minutën e fundit dukej se nuk e meritonim të ishim në fushë. Nuk mund ta shpjegoj pse. Nuk luajtëm sipas planit dhe nuk dëgjuam trajnerin. Luajtëm tmerrësisht keq. Ne nuk e meritojmë Ligën e Kampionëve apo Ligën e Evropës. Nuk e di pse nuk bëjmë atë që na kërkon trajneri. Nëse nuk jeni gati për ndeshjen, qëndroni në shtëpi. Nëse jeni nervoz, rrini në pankinë ose në shtëpi. Na duhen burra për të dalë për të luajtur. Kjo ishte një nga ndeshjet tona më të rëndësishme. I kërkoj falje tifozëve”, tha Xhaka pas ndeshjes.
