“Opozita sot flet shumë dhe bën pak. Duket sikur gjuajmë njëri-tjetrin nga mbrapa gardhit, në vend që të dalim me një kandidaturë për qytetarët. Opozita duhet të thotë ‘o do të marrë pjesë në proces ose nuk do të marrë pjesë në proces’. Nëse ne nuk kemi një marrëdhënie të drejtë me njëri-tjetrin, nuk mund të presim mirëkuptim nga ana tjetër”.
Kështu u shpreh në studion e A2 CNN, Fatmir Mediu, kreu i Partisë Republikane, teksa foli për zgjedhjen e presidentit të ri të vend dhe angazhimin e opozitës në këtë proces.
Më tej, Mediu theksoi se opozita duhet të kalojë në veprime konkrete dhe të vendosë për një kandidaturë.
“Ne jemi takuar me njëri-tjetrin, po, në kafe te Parlamenti. Por nëse flasim për marrëdhënie institucionale duhet të kemi takime institucionale. Nuk e di se çfarë na pengon të ulemi. Ka vetëm një letër të Alibeaj, me të cilën bie dakord, por duhet të kalojmë në veprime konkrete. Këtu dua të them te arritja në një kandidaturë”, shtoi ai.
