Vllaznia ka bërë të ditur se ka larguar nga posti i trajnerit të parë Elvis Plorin. Një situatë e pazakontë duke llogaritur se kanë mbetur edhe vetëm 2 javë kampionat si dhe është në lojë edhe një finale e Kupës së Shqipërisë.
“Klubi i Futbollit Vllaznia njofton se ka vendosur me mirëkuptim largimin nga pozicioni i trajnerit të pare Elvis Plorin. Falënderojmë trajnerin Plori për të gjithë kontributin e dhënë gjatë këtyre 2 viteve për ringritjen e klubit tone dhe i urojmë shumë suksese ne sfidat e ardhshme në pozicionin teknik brenda klubit tonë”, shkruhej në komunikatën e sotme të klubit shkodran.
Plori u emërua në drejtimin e kuqebluve pas shkarkimit të gjermanit Thomas Brdariç, por rezultatet e Vllaznisë nuk u përmirësuan.
Humbja e fundit ndaj Tiranës vendosi në dyshime të mëdha fatin e skuadrës në kampionat sa i përket kualifikimit në Europë e kësisoj, klubi ka vendosur të bëjë një ndryshim në pankinë në ndeshjet e mbetura.
