Ndeshja e fundit për Bajernin e Mynihut në një sezon ku arriti të siguronte titullin kampion disa javë para fundit të kampionatit. Transferta e Volfsburgut do të jetë stacioni i radhës për bavarezët që do të luajnë një ndeshje vetëm për statistikë. Trajneri Nagelsman tha në konferencën për shtyp se kërkon të bëjë një mbyllje sa më dinjitoze në Bundesligë.
34-vjeçari nuk harroi të fliste edhe për marrëdhënien e tij me Robert Levandovskin. Sa e rëndësishme është ndeshja me Volfsburgun?
Në radhë të parë dua t’ju falënderoj ju (gazetarëve) për bashkëpunim në këtë sezon i cili ka qenë nga më të bukurit për mua. Nesër (sot) do të jetë një ndeshje e radhës ku sigurisht rezultati nuk do të ketë shumë rëndësi për të dyja skuadrat.
Sa kanë ndikuar zërat për një largim të Levës te vetë lojtari?
Ai është stërvitur normalisht. Ndaj Volfsburgut do të jetë në fushën e lojës dhe do të mundohet të shënojë sa më shumë gola. Qëndrimi im dhe i klubit për të ardhmen e tij tashmë dihet nga të gjithë. Nëse doni më shumë informacion, duhet të pyesni atë (Levën).
Mund të quhet ky një sezon pozitiv?
Pa dyshim. Ishte një sezon i mirë në shumë aspekte. Nëse nuk do të kishim pasur shumë dëmtime dhe infektime me COVID në fillim të vitit, atëherë gjërat mund të kishin shkuar shumë më ndryshe për ne, por tani kjo i përket së shkuarës. Le të pushojmë pak dhe të mendojmë për sezonin e ri që do të jetë akoma dhe më i luftuar se ky që po lëmë pas.
Çfarë prisni në sezonin tjetër?
Të njëjtin rivalitet, ndoshta dhe më të ashpër. Dortmundi bëri mirë deri në fund, por ata gabuan ndeshjet e tyre, ashtu si dhe ne tonat. Në fund gjithçka u fitua me meritë nga ne që dominuam nga fillimi deri në fund. Klubi do të ketë kohë të përgatisë sezonin e ri dhe mendoj që ndryshe nga parapërgatitjet e sezonit të kaluar, këtë herë do të kemi më shumë kohë në dispozicion.
Është e vërtetë që Leva nuk i ka pëlqyer taktikat tuaja?
Ai nuk është ankuar për mënyrën e lojës. Është e vërtetë që ai nuk u furnizua në pjesën e parë të sezonit me krosime, por gjithsesi ai mban vendin e parë për goditjet drejt portës (150).
