I ftuar në emisionin “Çim Peka Live”, anëtari i Këshillit Kombëtar i PD-së Genc Pollo ka komentuar rrëzimin e rezolutës për të dënuar gjenocidin e Serbrenicës nga deputetët e PS-së.
Pollo ka theksuar se pretendimi i Ramës për Berishën nuk qëndron pasi është hipokrit dhe me dy standarde, pasi PS ka në rradhët e veta shumë persona që janë në listën e DASH.
Sipas Pollos, fakti që Rama voton kundër një dënimi të gjenocidit të Srebrenicës që ka konsensus ndërkombëtar, kjo është shumë shqetësuese, të qënit peng apo presioni i Vuçiçit është shumë shqetësues dhe është në vargun e disa veprimeve që janë problematike për Shqipërinë dhe Kosovën.
“Flasim për Sali Berishën por kemi të bëjmë me disa deputetë të opozitës që është iniciator i projekt rezolutës që u rrefuzuar sot nga mazhoranca rilindiste. Pretendimi se Berisha është përcaktuar nga DASH për të mos hyrë në ShBA nuk qëndron, është hipokrit dhe është me dy standarde.
PS ka në rradhët e veta shumë persona që janë në listën e DASH dhe njërin e shpalli mik tha nuk më duhet se çfarë mendon ShBA për këtë dhe e mbajti për më shumë se një vit në kryesinë e PS-së. Tjetrit nuk la drejtor pa i dhënë në qarkun e vetë dhe të tretit ja bëri familjarët deputetë.
Tani një projekt rezolutë që qëndron parimisht dhe moralisht, njerëzor dhe kombëtar dhe rrëzohet se një nga firmëtarët është Sali Berisha nuk qëndron dhe nuk e beson njeri. Pse mazhoranca, Rama voton kundër një dënimi të gjenocidit të Srebrenicës që ka konsensus ndërkombëtar, kjo është shumë shqetësuese, të qënit peng apo presioni i Vuçiçit është shumë shqetësues dhe është në vargun e disa veprimeve që janë problematike për Shqipërinë dhe Kosovën. Kjo nuk është një çështje e harruar”, tha Pollo.
