Kryeministri Edi Rama dhe ministri i Drejtësisë, Ulsi Manja, u shfaqën sot në një konferencë në selinë e PS, për të thënë se deklaratat e tyre ndaj SPAK nuk janë presion dhe as shprehin frikë, por synojnë që të kërkohet llogari 5 vjet nga momenti i nisjes së procesit të vetting dhe 3 vjet nga formimi i SPAK.
Ministri i Drejtësisë, Ulsi Manja u shpreh se PS nuk po cenon pavarësinë e gjyqësorit.
“Lidhur me pavarësinë e sistemit të drejtësisë nuk mund të akuzosh sot se po ndërhyjmë apo po cenojmë pavarësinë e gjyqësorit.
PS është krijuesja dhe mbështetësja kryesore e reformës në drejtësi. Për ne vendimet e Gjykatës zbatohen dhe nuk komentohen. Është e drejta jonë të kërkojmë performancë nga organet e drejtësisë. Performanca e institucioneve të drejtësisë është diçka e matshme referuar standardeve ndërkombëtare të drejtësisë së pavarur sot”, tha Manja.
Në vijim ai u shpreh se rreziku që vjen nga vonesat për hetimin e çështjeve që lidhen me gjyqtarët dhe prokurorët e shkarkuar nga Vetting është pikërisht tejkalimi i afateve dhe parashkrimi i veprave penale.
“Ku është shqetësimi ynë sot dhe në vazhdim? Nga 530 gjyqtarë që kanë kaluar filtrin e vettingut 197 prej tyre janë shkarkuar për deklarim të rremë, fshehje pasurie dhe mungesë të burimeve financiare për pasuritë e krijuara. 51 të tjerë kanë dhënë dorëheqjen për shkak të procesit të vettingut.
27 prej tyre kanë dhënë dorëheqje pasi kanë marrë rezultatet nga KPK. Për çfarë e bëmë vettingun? Thjesht një proces për të pushuar disa gjyqtarë dhe prokurorë që nuk e justifikojnë pasurinë? Thelbi i reformës së drejtësi është rritja e besimit të publikut shqiptar te drejtësia, sepse ne nuk kishim drejtësi. Në këtë fazë ne e kemi përgjegjësinë para shqiptarëve sepse nuk duam që besimi i publikut te drejtësia e re të bjerë në nivelet që ishte. Ne rrezikojmë të shkojmë në pikën zero, ky është shqetësimi.
Merrni listën e 10 gjyqtarëve dhe prokurorëve, janë të dhënat e organeve të Vetting me vendime përfundimtare nga KPK dhe KPA, që janë larguar se nuk justifikojnë dot pasuritë. Dhe flitet për miliona lekë apo mijëra euro, për vila e banesa të pajustifikuara, madje ka edhe nga ata që kanë ndërtuar në tokën e tjetrit”, tha Manja.
Në anën tjetër, Kryeministri Edi Rama u shpreh se drejtësisë së re nuk i ka munguar asnjë mbështetje, përfshi edhe financiare.
“E dini ju që pagat e ministrave nuk janë rritur asnjëherë, por pagat e këtyre të drejtësisë së re janë shtuar e rritur sa herë i kanë kërkuar”, tha Rama.
