Konferenca e Kryetarëve rrëzoi kërkesën e disa deputetëve të opozitës për ngritjen e një komisioni të posaçëm parlamentar për hetimin e investimeve strategjike. Ky vendim i Kuvendit nuk u mirëprit nga ana e opozitës, e cila e pa si frikë të mazhorancës për të bërë transparencë.
“Sot konferenca e kryetarëve votoi kundër kërkesës së opozitës për ngritjen e një komisioni të posaçëm për të bërë transparencë për ligjin për investimet strategjike. Unë e kuptoj që nuk është dëshira e qeverisë, sidomos pas komisionit hetimor për inceneratorët, që të jetë përball duke dhënë informacione se çfarë ka ndodhur me këtë ligj”, tha Tabaku në një prononcim për gazetarët pas mbledhjes.
Sipas kryetares të Komisionit të Integrimit, ky vendim i mazhorancës ishte në sinkron me qëndrimet e Edi Ramës ndaj SPAK.
“Ndërkohë që duhet të vinte e të jepte llogari për aferat e qeveritë, sot Edi Rama vazhdon me shfaqen e tij të radhës. Shihet edhe si një formë kërcënimi dhe e presioni ndaj SPAK për të mos vazhduare për të hetuar këto afera kur në qendër duhet të ishte qeveria. Kërcënim i institucioneve të drejtësisë së re, ndodh nga ato që sot kanë pushtet”, u shpreh Tabaku.
