Politologu Ilir Kalemaj, deklaratat e Kryeministrit Edi Rama, i cili tha se SPAK po shigjeton cironkat dhe jo peshqit e mëdhenj, i cilëson si mesazh për ndërkombëtarët.
Ai thotë se në pamje të parë duket sikur Rama i nxori dhëmbët SPAK duke e intimiduar, për të “ngrënë” edhe koka djathtas.
Për MCN Live, Kalemaj tha se Rama duket se po bën lojën e pasqyrave me atë që duket si intimidim për njerëzit e drejtësisë.
SPAK s’po bën asgjë për të marrë të pandehur elementë te zinxhirit të inceneratorëve. Rama po iu bën qejfin ndërkombëtarëve dhe po i thotë elektoratit socialist se vërtetë jam me ju, nuk iu tradhtoj deri në fund.
Do i qëndroj Dakos dhe aleatëve politikë dhe po bëj të pamundurën që SPAK të hajë djathtas. Përballë ndërkombëtarëve, Rama po tregon se SPAK nuk është nën hyqmin e tij politik. Spartak Braho e kishte kritikuar me gjuhë të ashpër Ramën, për kritikë. Këtu ose Braho është prishur me socialistët ose është pjesë e skenarit.
Në vijim tha se SPAK është organ i centralizuar për krimin e lartë shtetëror, ndërsa Prokurorin e Përgjithshëm e krahasoi me kancelar.
Kalemaj shtoi se bie dakord që SPAK dhe Byroja Kombëtare e Hetimit janë vështirë të kapen, duke folur për organe kolegjiale dhe në këtë drejtim nënvizoi se nuk është e centralizuar prokuroria e përgjithshme.
Sipas tij, është e vështirë të kontrollohet nga qeveria SPAK dhe Byroja Kombëtare e Hetimit dhe se Rama në rastin më të mirë lan duart.
Kalemaj shtoi se nëse SPAK ndërmerr nisma të tjera ndaj anëtarëve të ekzekutivit, Rama thotë se është me shtysë politikë, dhe në këtë drejtim i paraprin.
I pyetur nëse e shkeli vijën e kuqe politikisht Edi Rama me deklaratën e tij, ai foli për lojëtar të rafinuar.
Rama është një lojtar i rafinuar politik, tregon se është më tepër tym për të fshehur aksionin e tij politik. Nëse do kryqëzonte zotin Berisha apo zotin Meta, ai kishte kohë të mjaftueshme 9 vjet, nuk do e bënte Metën President. Do e bënte këtë gjë në mënyrë tinëzare dhe do i vinte para faktit të kryer. Në ka një gjë që shkëlqen zoti Rama, është ajo e kapjessgafil të kundërshtarit politik dhe pjesa e medias.
Është jashtë profilit të Ramës të detyronte SPAK të vepronte ndaj kundërshtarit politik. Opozita është e përçarë në 3-4 pjesë nuk e kërcënon Rama. Është një pjesë me Alibeaj dhe Bashën, ndoshta pjesa më e madhe me Berishën dhe një pjesë si ato pulat pa kokë në qymez, që nuk kanë një mendim politik dhe profil politik.
Nuk ka asnjë dyshim që në një republikë ekzekutive si e jona, ai që e kontrollon sistemin e drejtësisë, është ai që është në pushtet. Ashtu ndodh dhe në vende të tjera, jo më ne që jemi sistem hibrid. Nuk mendoj se zoti Rama i frigohet SPAK. I frigohet si kosto politike, nëse zinxhiri i drejtësisë do të shkojë më lart.
Rama nuk ka në burg të tijët. Njëri ministër dhe një funksionar i lartë të ardhur nga LSI. Ai mund të justifikohet se edhe nëse ka mollë të kalbura, erdhën nga ish-aleati ynë super i korruptuar. Ne u ndamë nga pjesa e kalbësirës.
Sa i takon Sali Berishës tha se Berisha i parë ka qenë më potent, kishte kërcënime reale të besueshme dhe të kritikuar gjerësisht nga organizmat ndërkombëtarë, ishin kërcënimet e një autokrati që kishte pushtet gati gati absolut.
Berisha i dytë nuk e kishte atë fuqi, pasi ishte i kushtëzuat nga numrat dhe koalicioni. Zoti Rama vjen nga një profil tjetër, por nuk është aq i egër që mund të ushtrojë pushtet ndaj drejtësisë dhe medias.
Rama përdor më tepër karrotën se kërbaçin, por nuk lë pa e përdorur kërbaçin nëse i duhet. Bën më tepër show. Zoti Rama pas 9 vitesh zgjohet një mëngjes, dhe udhëzon SPAK pas 9 vitesh, ndërkohë që mundej më herët. Kreu i SPAK, Kraja tha ‘na sillni dosje jo deklarata politike’.
Kalemaj deklaroi ndër të tjera se Edi Rama e dinte mirë që çështja “Dovrani” ishte e pushuar, por tha se ishte thjesht loja e tymit dhe pasqyrave.
Sot të bësh deklarata politike në momentin që nuk ke dërguar dosjen, tregon ose intimidim, ose Rama po bën lojë pasqyrash që të çajë kundërshtarët politikë dhe të mbajë të bashkuar të vetët. Është një ushqim për militantët, por asgjë më tepër se kaq.
