Kamera ‘Go Pro’ e çifiti polak është gjetur dhe sekuestruar nga grupi hetimor. Çifti Valdemar dhe Marta Makovski, kishin ardhur në Shqipëri për të kaluar disa ditë pushimi. Kamera që kanë pasur dy viktimat të instaluar në motorin e tyre, me të cilin po udhëtonin dhe kamera është sekuestruar nga Policia, pamjet e së cilës do të shihen për të mësuar më shumë mbi dinamikën e këtij aksidenti tragjik.
Turistët nga Polonia humbën jetën ditën e djeshme në një aksident tragjik të ndodhur në aksin Shkodër-Tiranë, në afërsi të fshatit Shkjezë, në zonën e Bushatit. Viktimat, 47 dhe 42 vjeçe, po udhëtonin me një motor në drejtim të Tiranës, kur u përplasën me automjetin tip “GOLF 5” të drejtuar nga David Gjonaj nga Puka, 27 vjeç, i cili kishte marrë me qira automjetin.
Dyshohet se shkak i aksidentit mund të jenë bërë mosrespektimi i rregullave të qarkullimit rrugor. Pas përplasjes së fortë me dy viktima, efektivët kanë shoqëruar në Komisariatin e Policisë Shkodër drejtuesin e automjetit tip “GOLF 5”, David Gjonaj. Policia bën të ditur se pas testit ka rezultuar se drejtuesi i automjetit nuk kishte konsumuar alkool. Nga dyshimet, drejtuesi i automjetit tip “Golf”, Gjonaj, ka prerë rrugën kryesore për t’u futur në një karburant në anë të rrugës, me qëllim për t’u furnizuar, por në atë moment ka ardhur motori i dy turistëve, duke u përplasur me makinën. Drejtuesi i motorit Valdemar Makovski është munduar që të frenojë, por nuk ka pasur kohë duke u përplasur me mjetin dhe duke përfunduar disa metra në ajër e më pas në tokë, përplasje e cila i mori jetën në moment 47- vjeçarit dhe bashkëshortes së tij.
