Pasditen e djeshme, duke nisur nga ora 17:00, Partizani zhvilloi në kompleksin e ekipit në Tufinë, stërvitjen e fundit përpara derbit numër 4 ndaj Tiranës në këtë sezon.
Për të dëshmuar qartë rëndësinë që kjo sfidë ka për tifozët, ultrasit e të kuqve u kujdesën ta dëshmojnë që dje jo me fjalë, por me vepra.
Për herë të parë ata ndoqën një stërvitje të ekipit, teksa ishin rreth 100 të pranishëm. Interesant ishte fakti se fillimisht u vendosën në tribunën qendrore, por pas pak çastesh lanë të kuptohet se nuk u ndien rehat aty dhe ndërruan anë, duke kaluar në tribunën përballë, ku edhe do të kenë vendin e tyre në të ardhmen, kur Partizani të luajë në atë impiant.
Në momentin që ekipi zbarkoi në fushë, ata e mbështetën me brohoritma, teksa Mehmeti bashkë me lojtarët u afruan menjëherë tek ata. Pas falënderimit, Mehmeti kërkoi që tifozët të mos i bënin video ekipit gjatë seancës, për të mos dekonspiruar skemat që do të përdoren.
Në vazhdim, stërvitja vijoi normalisht, me stafin teknik, që u kujdes të mos e ngarkonte shumë skuadrën fizikisht. Duhet të themi se nisja e seancës stërvitore u vonua pak dhe shkak ishte video-analiza që skuadra i bëri Tiranës ditën e djeshme, ku çdo detaj është studiuar me hollësi nga Mehmeti dhe ndihmësi i tij, Fatjon Tafaj.
I vetmi, që nuk u stërvit me grupin ishte Valentino Murataj. 25-vjeçari ka ndier një problem fizik, që nuk është në shkallën për të mos e lejuar të jetë i pranishëm në derbi, por bashkë me doktorin Dhimosten Gjini, vendosi të pushonte dje, për të mos rrezikuar.
Në fund të stërvitjes, “Guerrils”-at kishin rezervuar edhe një spektakël me mjete piroteknike, me qëllim karikimin sa më të madh të skuadrës.
Në lidhje me formacionin, pritet që Partizani të mos ketë shumë ndryshime në krahasim me ndeshjen ndaj Kukësit. Rikthimi i madh për këtë sfidë është Masanga Matondo.
Kongolezi është në balotazh me Herald Markun, që shkëlqeu ndaj Kukësit. Gjithsesi, 22-vjeçari shihet më i avantazhuar./Panoramasport
