Ministrja e Shtetit për Marrëdhëniet me Parlamentin, Elisa Spiropali, ka reaguar menjëherë pasi Këshilli Kombëtar i PD-së miratoi rezolutën për zgjedhjen e Presidentit të Republikës.
Në rezolutë vendosej kushti i pranimit të kandidaturave që do të propozoheshin nga Rithemelimi dhe aleatët e tjerë opozitarë.
Në një postim në rrjetin e saj social, Spiropali shkruan se nuk e njihnin një vendim të tillë, sepse vinte nga një person i shpallur non-grata, duke shënjestruar ish kryeministrin Sali Berisha.
“Nëse është e vërtetë që Saliu paska mbledhur një kuvend për të vendosur kusht që hyjnë në negociata për Presidentin e ri vetëm nëse pranohet kandidati i tyre, atëherë ngushëllime kuvendarëve në fjalë dhe një kujtesë nga ana jonë: Grupi Parlamentar Socialist nuk njeh asnjë vendim të asnjë instance që buron nga shkulmi anti-amerikan i një personazhi të listës së zezë të Shteteve të Bashkuara të Amerikës dhe nuk ka ndërmend të ketë asnjë kontakt me atë burim të së keqes për Shqipërinë”, shkruan Spiropali.
Spiropali është një nga 3 negociatorët e caktuar nga Partia Socialiste për atë që e konsideron si proces negociatash me opozitën për zgjedhjen e Presidentit. Deri më tani socialistët kanë pranuar të negociojnë me Enkelejd Alibeajn, i cili mbante funksionin e kreut të Grupit Parlamentar të PD, por u shkarkua nga ky funksion me 30 prill.
Duket se socialistët do të insistojnë deri në fund për vijimin e negociatave me Alibeajn, duke shpresuar se do të përdorin disa prej deputetëve të PD-së, për të siguruar numrin e nevojshëm të votave që iu duhen për zgjedhjen e Presidentit të ri në 3 raundet e para të votimit, atëherë kur duhen 84 vota.
