Në një draft-rezolutë, që pritet të miratohet nga Këshilli Kombëtar të PD, thuhet se Edi Rama nëse kap edhe postin e Presidentit të Republikës, atëherë vendos kontrollin e tij 100 % të çdo institucioni në vend.
Në draftin e paraqitur para Këshilli Kombëtar nga deputeti Oerd Bylykbashi, thuhet se Edi Rama ka kapur edhe sistemin e drejtësisë.
“Kushtetuta sugjeron gjetjen e një konsensusi politik dhe parlamentar për zgjedhjen e Presidentit. Por raportet e OSBE/ODIHR, si dhe raportet e DASH, damkosin zgjedhjet e 25 prillit për shit-blerje mandatesh, çka do të thotë se kjo mazhorancë nuk mund të zgjedhë e vetme Presidentin, pavarësisht se ka votat”, tha Bylykbashi.
Në vijim ai akuzoi mazhorancën socialiste se po përpiqet të krijojë e idenë e një procesi konsensual, i cili është i rremë.
“Zgjedhja e Presidentit mund të bazohet vetëm në vullnete të vërteta politike. Duhet konsensus politik dhe parlamentar, që arrihet përmes dialogut në nivele të larta politike të partive parlamentare”, thuhet në draft rezolutë.
Vullneti politik i PD, bazohet vetëm te vota e anëtarësisë dhe zgjedhësve të saj, tha Bylykbashi, duke shtuar se PD do të shprehë vullnetin e saj lidhur me Presidentin, me votën e Grupit Parlamentar, pa u bërë pjesë e procesit të farsës që po inicohet nga socialistët.
Bylykbashi tha se pa një konsensus politik të vërtetë, çdo propozim do të refuzohet me votë në Kuvend.
